Con esti nuevu alcuerdu, la Fundación Asturies XXI y el CIFP d’Hostelería y Turismu de Xixón quieren dar un pasu más y consolidar un trabayu conxuntu continuáu que permita ampliar l’oferta d’actividaes y afondar na tresmisión d’una formación sólida, actual y comprometida cola realidá cultural asturiana
La Fundación Asturies XXI y el Centru Integrau de Formación Profesional d’Hostelería y Turismu de Xixón formalizaron estos díes un alcuerdu que consolida la estrecha collaboración que vienen manteniendo dende hai años. Con esti documentu, dambes entidaes afiten un marcu estable pa dar puxu a actividaes formatives, culturales y d’espardimientu nes que compartan interés y resulten beneficioses pa los estudiantes y pa la ciudadanía asturiana.
El pautu naciera cola voluntá d’axuntar enfotos y facilitar la puesta en marcha de cursos, talleres, charres y otres propuestes capaces d’apurrir valor añadíu a la formación impartida nel centru y, al mesmu tiempu, contribuyir al espardimientu del padremuñu cultural asturianu. La Fundación Asturies XXI —centrada nel fomentu del desendolcu del territoriu, nel espardimientu de la cultura y na so preservación— y el CIFP, especializáu na preparación profesional nos ámbitos hosteleru y turísticu, comparten la idega de que la ensiñanza nun pue desligase del contestu nel que se va exercer la futura vida llaboral.
Dambes instituciones destaquen la importancia de que l’alumnáu conozca de primer man los productos propios, la historia, les tradiciones y les señes d’identidá del país, elementos que consideren esenciales pa fortalecer una formación de calidá y estrechamente venceyada al territoriu. Esa mirada común foi la que favoreció collaboraciones previes, como’l cursu de Sumillería de la Sidra o l’organización de tasties, charres y esposiciones nes que participaron profesionales y estudiantes.
Llucía F. Marqués
This work is licensed under a Creative Commons Attribution 4.0 International License.
