El simposiu, que va cellebrase en Madrid los díes 16 y 17 d’abril, pretende afondar na divulgación científica al rodiu l’idioma asturianu
Yá ta abierta la recepción de propuestes de ponencies pa participar nel III Congresu Internacional de la Llingua Asturiana, que va celebrase en Madrid los prósimos 16 y 17 d’abril de 2026. Les persones interesaes en presentar una comunicación puen ponese en contautu con Iniciativa pol Asturianu, entidá encargada d’entamar la presencia de participantes nel eventu.
Les ponencies han tar rellacionaes cola llingua asturiana y pueden centrase n’analises o investigaciones de cualesquier ámbitu: lliteratura, hestoria, llingüística, filoloxía o cultura. Les esposiciones pueden llegar del mundu universitariu, del movimientu asociativu o del ámbitu formativu. Nes ediciones anteriores, el congresu contó con investigadores y especialistes de les universidaes d’Uviéu, Ștefan cel Mare (Suceava), Vigo, Oklahoma State, California Riverside, Tennessee, Sussex, The City University of New York, París, Varsovia, Viena, Granada o Burgos.
El congresu, de celebración bianual (2022, 2024 y agora 2026), ta coordináu pol profesor Avelino Corral, doctor del Departamentu de Filoloxía Inglesa de la Universidá Autónoma de Madrid, lo que desplica la so cellebración fuera d’Asturies y evidencia l’interés pola llingua asturiana fuera de les nueses fronteres. Iniciativa pol Asturianu y l’Academia de la Llingua Asturiana collaboren col proyeutu que tien l’envís de furrular como un espaciu d’altavoz y reflexón científica tocante a la situación del asturianu. Como nes sos primeres ediciones, repítese la sede na Facultá de Filosofía y Lletres de la Universidá Autónoma de Madrid, onde nel 2022 y 2024 se celebraron les xornaes baxo’l llema “Distintividá, identidá y oficialidá”.
Susana Sela 
This work is licensed under a Creative Commons Attribution 4.0 International License.
