Cola muerte de dos persones na cai de Xixón, reábrese un alderique necesariu: l’esmolecimientu pol xorrecimientu de les persones ensin llar n’Asturies
La muerte de dos persones ensin llar nes cais de Xixón en menos d’un mes volvió poner enriba la mesa un alderique que’l país lleva años posponiendo: l’aumentu constante de persones ensin llugar onde vivir n’Asturies. Les cifres disponibles dibuxen una realidá que respiga.
Ye complicao calcular el númberu de persones nesta situación, precisamente por ser imposible’l so censu, siendo bona parte d’ellos “invisibles” pa la sociedá. Colos datos colos que cuntamos pue calculase esa cifra pente les mil y dos mil persones.Una media de 973 persones agospiénse ca nuechi en centros o albergues pa persones ensin llar n’Asturies, un 13 % más que en 2022. A esto hai qu’amestar otres cerca de cien persones diaries atendíes na cai, lo que marca un mínimu que pasa les mil persones. La organización Cáritas Diocesana d’Uviéu elevó la cifra hasta 1.610 pidiciones d’ayuda por falta de techu.
La realidá podría ser entá más fonda si se tienen en cuenta quienes refuguen ayuda institucional, viven n’infraviviendes, soluciones temporales o habitáculos precarios que nun entren nos recuentos.
Na ciudá de Xixón, onde se produxeron los últimos fallecimientos, los datos más recientes apunten a unes 290 persones en situación d’ensinllarismu. Delles 76 duermen directamente na cai, ente que’l restu dependen d’albergues o recursos asistenciales.
El coleutivu ye ampliu y hetereoxeneu: persones en busca d’emplegu, xente mayor con pensiones insuficientes, persones con enfermedaes cróniques, adicciones o problemes de salú mental. L’ascensu de muyeres nesa situación ye especialmente esmolecedor pola mayor vulnerabilidá que presenten: los datos de 2025 falen de 262 muyeres, más del triple que l’añu anterior.
Los expertos coinciden en que la mezcla ente falta de vivienda asequible, precariedá llaboral y una atención insuficiente a la salú mental ta na base d’esta crisis social. Un fenómenu que, llonxe de menguar, sigue medrando y esixe d’un abordaxe seriu, estable y con recursos continuos.
Llucía F. Marqués
This work is licensed under a Creative Commons Attribution 4.0 International License.
