El so proyectu de novela, Ashram, foi escoyíu pol comité de la Residencia Lliteraria Xixón como beneficiariu de la I Beca Rosario Acuña pa muyeres escritores. Esta beca va permiti-y pasar un mes na residencia pa desendolcar el procesu creativu d’una obra narrativa que la trae a Xixón
Nacida n’Ouviñana, en Cuideiru, Mercedes Ruisánchez ye Filóloga pola Universidá d’Uviéu y anguaño ta xubilada. A lo llargo de 34 años exerció como profesor de Llingua Castellana y Lliteratura y de Llingua Asturiana y Lliteratura n’Educación Secundaria y Bachilleratu. Foi tamién asesora técnica docente del Centru de Profesoráu y Recursos d’Avilés, responsabilizándose dell’Ara de Sociollingüística y de les biblioteques escolares durante dellos años.
Xunto con Xuan Busto y Ángel Valle, asoleyó en 1988 la Guía bibliográfica pal estudiu de la lliteratura tradicional asturiana, una obra de referencia. Collaboró na revista Lliteratura, de l’Academia de la Llingua Asturiana, y en 2025 consiguió ún de los premios más reconocíos de les Lletres Asturianes, el Premiu Fernán Coronas de Poesía n’asturianu, pola obra Camín de casa, anguaño en procesu d’espublización.
La Residencia Lliteraria Xixón convocó esta beca en collaboración cola Conceyalía de Cultura y Educación de Xixón. Ta empobinada a muyeres escritores de cualesquier xéneru lliterariu y de cualesquier llingua que precisen un espaciu y un tiempu dedicáu a la realización d’un proyectu creativu.
La beca ufierta una estancia d’un mes na ciudá de Xixón, del 24 de payares al 24 d’avientu de 2025. Inclúi agospiamientu na Residencia Lliteraria Xixón, una dotación pa los gastos de tresporte y la organización de dellos actos venceyaos cola presencia de la autora becada.
Inaciu Galán, director de la Residencia Lliteraria Xixón, amosó’l so satisfaición cola escoyeta de Mercedes Ruisánchez. «Teniendo en cuenta la curtia nómina de muyeres con novela asoleyada n’asturianu, ye una gran noticia que dende la Residencia Lliteraria Xixón podamos aportar el nuesu granín d’arena al nacimientu d’una nueva obra que siga’l camín entamáu nel sieglu XIX por Enriqueta González Rubín. La lliteratura asturiana ye l’única d’Europa que tuvo a una muyer como primer novelista, y tenemos de siguir favoreciendo que esa tradición tenga continuidá nes lletres contemporánees. El proyectu de Ruisánchez va ser una aportación bien valoratible nesi camín».
Susana Sela
This work is licensed under a Creative Commons Attribution 4.0 International License.
