Les revisiones de gráu de la Xunidá de Dependencia de Xixón paralizaes por mor d’un “problema de l’aplicación informática”, ello ye, que namás que tan tramitándose les resoluciones iniciales, quedando a la espera toles necesaries adaptaciones a les situaciones variables de ca dependiente
La Xunidá de Dependencia de Xixón carez un colapsu que afecta de mou direutu a cientos de familiares y persones dependientes del conceyu. Les revisiones de grau tán paralizaes por mor d’un problema na aplicación informática que xestiona los espedientes. Esti fallu fai que namái s’estean tramitando les resoluciones iniciales, quedando n’espera toles modificaciones que dependen de cambios na situación de ca persona.
A esta traba súmase lo que los propios trabayadores del serviciu lleven meses advirtiendo: falta personal p’atender con normalidá la carga de trabayu, lo que entorpez la resolución d’espedientes y les comprobaciones necesaries pa cada revisión.
La situación informática actual nun fai más que agravar un problema que lleva tiempu manifestándose. Nel primer semestre del 2025, 724 persones morrieron n’Asturies ensin llegar a recibir la prestación a la que teníen drechu pol so grau de dependencia. La cifra ye especialmente dura porque 685 d’eses persones nunca tuvieron valoración, polo que morrieron ensin que l’Alministración llegare a estudiar el so casu; 39 más teníen la prestación reconocida, pero nunca llegaron a cobrála.
Estes cifres proceden de los datos oficiales del Oservatoriu de la Dependencia y fueron espublizaes en xunetu de 2025, amosando que la mortalidá en llista d’espera n’Asturies situóse nesa facha como una de les más altes del Estáu.
Xixón pertenez a l’área sanitaria V, una de les que tienen mayor tiempu mediu de tramitación. En febreru de 2025, la demora media n’Asturies taba en 10,8 meses, pero nel área de Xixón llegaba a alredor d’un añu, según los datos espublizaos entós por dellos medios. Esta tardanza afecta tanto a les valoraciones iniciales como a les revisiones, un elementu clave pa persones cuya situación física o cognitiva apiora con rapidez.
El personal técnicu d’esti campu lleva denunciando dende va años que la unidá de valoración precisa más profesionales pa atender la carga d’espedientes. Les xornaes de trabayu, según indiquen fontes sindicales, tán dedicaes en munches causes a procesos administrativos prioritarios que nun dexen espaciu pa poner al día les revisiones pendientes.
Nos llares xixoneses esta situación traduzse en más cuidadores asumiedo soles la carga del día a día, ensin sofitu públicu, ensín prestación económica y ensin servicios que s’adapten al grau real de dependencia de quien atienden.
Pa munches families, ca mes de retrasu significa un esfuerciu mayor, un gastu superior y un desgaste emocional fondamente dañible. Y pa les persones con patoloxíes graves o con deterioros rápidos, los meses perdíos son decisivos.
La paralización de les revisiones de dependencia en Xixón nun ye un incidente aisláu, sinón un síntoma d’un sistema que llega tarde de manera crónica. El fallu informáticu actual y la incapacidá pa implementar soluciones alternatives vien a evidenciar lo endexe que ye’l furrulamientu de la dependencia.
Llucía F. Marqués
This work is licensed under a Creative Commons Attribution 4.0 International License.
