La organización nacionaliega afirma nel so comunicáu que la vida de los trabayadores nun pue tratase como un costu asumible, reclamando que, nel casu de Vega de Rengos, se faiga una investigación técnica rigorosa de qué falló nel esbarrumbe y depure responsabilidaes ensin contemplaciones; de manera más xeneral, desixe midíes de control reales sobre les condiciones llaborales nel conxuntu del país y una política preventiva que vaya más allá de los protocolos en papel
Un nuevu esbarrumbe nun nivel -2 d’una explotación en Cangas del Narcea acabó la selmana pasada cola muerte de dos mineros, un golpe que volvió respigar Asturies y que recuerda, doliosamente, una traxedia que pensábemos superada. L’accidente mortal na mina de Vega de Rengos reabrió les mesmes entrugues que l’acidente de Zarréu esti mesmu añu ¿cómo ye posible que, nun país que lleva años ensin apostar pola minería como columna vertebral económica, siga habiendo muertes baxo tierra?
Nel casu de Vega de Rengos, y al contra de lo que pasara na mina de Zarréu en marzu, había inspecciones y permisos recién emitíos, pero ensin garantizar les condiciones reales d’esplotación. P’Andecha Astur, esti fechu fai entá más urxente una investigación seria y tresparente, con capacidá real pa imponer sanciones. Nun se trata namás d’esclariar qué falló, sinón d’asegurar que nun se repita y dar a les families una respuesta clara: quién tenía la responsabilidá d’evitar esti accidente y qué va facese pa que nun torne a asoceder.
Los accidentes de Vega de Rengos y Zarréu amuesen que la siniestrabilidá llaboral n’Asturies nun ye un problema conxuntural, sinón de cadarma y p’Andecha Astur, la solución pasa por una intervención darréu dende Asturies mesma, con responsabilidaes clares, controles efectivos y un mensaxe inequívocu: dengún trabayador tien d’arriesgar la vida ca día solo por ganase’l pan.
Les cifres xenerales refuercien l’alarma. En 2024 sumáronse 11.765 accidentes llaborales con baxa, 80 d’ellos graves y 17 mortales. Nel 2025 van yá 19 muertes nel trabayu, con siete namás na minería. Asturies ta viviendo un ascensu evidente de siniestros qu’afecta a sectores distintos —dende la construcción a l’agroindustria— y que señala un problema de cadarma qu’Andecha Astur resume comu precariedá, controles insuficientes, impunidá de los culpables y un sistema preventivu que nun ta furrulando.
Entantu, denuncien, dende’l Gobiernu asturianu inviértese’l discursu n’hipótesis, frases valeres y dilaciones. La propuesta d’Adrián Barbón d’impulsar un “pautu d’estáu contra la siniestrabilidá llaboral” aplaza, otra vuelta, la capacidá d’Asturies p’actuar darréu y cola contundencia que la situación desixe, apunten dende’l partíu nacionaliegu. P’Andecha Astur, nun ye momentu de derivar responsabilidaes nin d’esperar por compromisos estatales que nun lleguen: ye momentu d’actuar equí y agora.
Llucía F. Marqués
This work is licensed under a Creative Commons Attribution 4.0 International License.
