La Conseyería de Ciencia, Industria y Emplegu vien d’autorizar la costrucción d’una nueva soestación lléctrica de 400 kV en Tamón (Carreño) xunto coles sos llinies d’alta tensión de conexón con Grao y Avilés. L’anunciu espublizóse güei nel BOPA y confirma que nin les alegaciones presentaes pola Coordinadora Ecoloxista d’Asturies nin les de los vecinos de la zona fueron teníes en consideranza, un fechu que volvió espertar esmolecimientu nos conceyos afeutaos
La istalación, bautizada como soestación Cardoso, supondrá la ocupación d’unes 15.000 metros cuadraos de finques rústiques na zona de Monte Grande, en Tamón. Esti proyectu ye’l mesmu que, enantes, se quiso empobinar a la parroquia de Cardo (Gozón), onde la oposición vecinal consiguiera paralizalu. Forma parte d’un ampliu entramáu conocíu como l’anillu central d’alta tensión, que busca reforzar la conexón ente Soto Ribera y Llaviana a partir d’una rede de nueves subestaciones y llinies de 400 kV que crucien una ventena de conceyos d’Asturies, ente ellos Uviéu, Llanera, Grau, Corvera, Avilés, Gozón, Carreño, Xixón, Siero, Sariegu, Nava, Bimenes, Llaviana y Llangréu.
A mayor d’esta soestación, prevese otra istalación de 220 kV empobinada pola empresa distribuyidora, que nun salió a consulta pública y que l’alministración pretende tramitar de manera separtada, a pesar de que les dos formen parte d’un mesmu conglomeráu d’infraestructures.
Dende la Coordinadora Ecoloxista remembren que les alegaciones presentaes insistíen n’aspectos claves pa minimizar l’impactu d’un proyectu d’estes dimensiones. Pidíen que l’anillu central se tramitare como un únicu plan global, y non fraccionáu en expedientes estremaos que, al so xuiciu, dificulten l’evaluación real del impautu acumulativu sobre’l mediu y sobre les poblaciones. Demandaben tamién que les dos soestaciones de Tamón foren blindaes y semienterraes, cola fin de menguar la contaminación visual y electromagnética, amás de los ruidos de los transformadores que la vecindá tendría de sufrir a curtia distancia.
Nes sos aportaciones, l’asociación reclamaba igualmente que les llinies d’interconexón fueran soterráes, pa evitar afecciones visuales y acústiques, minimizar el riesgu d’incendiu forestal y reducir el peligru que supón pa les aves la electrocución nos tramos aéreos.
La Coordinadora acusa a la empresa distribuyidora de nun tener previsión y d’apostar por una planificación “cicatera”, al nun integrar toles pieces d’esti gran proyeutu nin adoptar midíes eficaces pa contener los impautos. Consideren imprescindible que les empreses promotores asuman los costes d’implementar soluciones que protexan tanto’l mediu ambiente como’l bienestar de les persones que viven nos entornos afeutaos.
Nel comunicáu, l’asociación alerta de que les decisiones tomaes pola Conseyería consoliden un modelu d’implantación d’infraestructures “altamente agresivu”, que podría tener consecuencies severes pa’l paisaxe, la fauna y la calidá de vida nes zones rurales d’Asturies. Al tiempu, comprométense a siguir xixilantes y a emplegar toles ferramientes disponibles pa garantizar que les alministraciones y les empreses tengan en cuenta’l drechu de la ciudadanía a decidir sol so territoriu y a nun cargar col pesu d’infraestructures que, al so xuiciu, nun tienen una xustificación d’interés públicu nidiamente acreditada.
Susana Sela
This work is licensed under a Creative Commons Attribution 4.0 International License.
