La revista de divulgación científica n’asturianu suma un nuevu volume pa fortalecer la presencia de la llingua nos ámbitos científicu y téunicu

La Universidá d’Uviéu vien d’asoleyar el númberu 15 de Ciencies. Cartafueyos Asturianos de Ciencia y Teunoloxía, la publicación que dende 2011 trabaya por esparder na sociedá asturiana los avances científicos y teunolóxicos emplegando la llingua asturiana como vehículu y col compromisu d’una divulgación rigurosa y accesible.

La revista nació col envís de tresmitir conocimientos científicu-téunicos a tol públicu, pero con especial atentu al profesoráu d’asturianu en tolos niveles educativos. D’esta miente, Ciencies ye una ferramienta clave pa dignificar y ampliar’l vocabulariu científicu de la llingua asturiana, un espaciu nel qu’aún quedaba muncho camín por percorrer y que la Universidá d’Uviéu contribúi a fortalecer añu tres d’añu.

El númberu 15 caltién esa llinia, con artículos que aborden ámbitos tan diversos como les matemátiques, la bioloxía, la salú, la xeoloxía o la educación ambiental. Los conteníos que formen parte d’esti volume son los siguientes:

· Los númberos primos. Teoremes y conxetures
Autor: Francisco Argüeso Gómez

· La narcolepsia na etapa infantil y xuvenil
Autor: Xesús González Rato

· ¿Ú tán les coraes del planeta?
Autor: José Ramón Obeso

· El llixiviáu d’arsénicu nes escombreres de les mines de mercuriu en Ḷḷena
Autores: Ángeles Fernández González, Begoña Fernández Pérez, Antonio Marqués Sierra y Noemí Guallar Machín

· Naturalización urbana y dellos exemplos en Xixón
Autor: Xuan Carlos Martínez Sánchez

· Los lliques urbanos como ferramienta pa la reflexión educativa al rodiu de la calidá del aire na nuesa ciudá. Un ensayu n’Uviéu
Autores: Antonio Torralba-Burrial, Eduardo Cires y Sergio Pérez-Ortega

Con esti númberu, la Universidá d’Uviéu reafita’l so compromisu cola divulgación científica n’asturianu y cola normalización del idiomu nos espacios onde tradicionalmente tuvo menos presencia. Ciencies sumóse, con cada nueva entrega, a esa llucha por demostrar que la investigación y la ciencia tamién pueden comunicase con calidá y rigor na llingua propia d’Asturies.