El claustru llama a la convivencia y afita que nun va permitir comportamientos contrarios a los valores democráticos
Un neñu del C.P. San Félix, en Candás, entamó a cantar Cara al sol mientres realizaba’l saludu fascista nuna de les aules del centru. La docente encargada del grupu afeó-y de darréu’l comportamientu, esplicando que nun yera apropiáu, y pidió-y que parara.
L’actu, llueñe de quedar ehí, derivó nuna situación d’enfrentamientu. Los padres del escolín acudieron al centru pa protestar y, según señaló’l propiu equipu docente, intimidaron a la profesora con gritos ya insultos. Dempués de salir de la “reunión”, presentaron una denuncia contra ella, llegando a acusala de ’“llanza-yos sielles y meses”. Una versión que’l centru nun consideró plausible en dengún momentu, pente otros motivos, pola dificultá física d’un fechu asina.
Ante esti clima, el claustru del C.P. San Félix remitió una comunicación a toles families na que reafita que’l centru nun va permitir, baxo denguna circunstancia, nin l’apoloxía de dictadures nin manifestaciones que puedan poner en riesgu la convivencia y el respetu mutu. Na mesma nota, piden a les families que centren los esfuercios na educación de los sos fíos, amosando un compromisu firme col caltenimientu d’un ambiente escolar de respetu y tolerancia.
El simple fechu de que yá seyan necesarios avisos d’esti caláu ye sintomáticu de la deriva preocupante que ta viviendo la sociedá, con un incrementu de conductes que normalicen símbolos o discursos facistes. Un indicador seriy de cómo s’educa a parte de les nueves xeneraciones y una llamada d’atención que nun se debería ignorar.
El reconocimientu del claustru y de la profesora protagonista ye, poro, más que merecíu.
Llucía F. Marqués
This work is licensed under a Creative Commons Attribution 4.0 International License.
