La Asociación Centro Cultural Balada entrega los sos premios añales y abre una esposición sobre Asturies y Transilvania
L’Asociación Centro Cultural Balada celebró ayeri la so gala de premios correspuendiente a esti añu, un actu qu’aconceyó a un bon númberu de representantes del mundu cultural y del asociacionismu de Xixón y d’Asturies. L’eventu sirvió tamién pa abrir al públicu la esposición Asturies y Transilvania, xuníes pola sidre y la montaña, que podrá visitase na sede social de la propia asociación.
Los premios repartíense ente estayes como la poesía, la música y la cantautoría, la comunicación, les redes sociales y l’actividá asociativa, teniendo ca galardonáu la oportunidá de presentar la so trayeutoria y proyeutos. La ceremonia, que rexistró una participación abondosa, desendolcóse nun ambiente de cercanía y reconocimientu al llabor cultural que se fai nel país, xenerando sinerxes y creando contautos non solo pente Asturies y Transilvania, sinón pente persones d’estremaos ámbetos culturales, artísticos. “influencers” y asociacionistes.
Dientro de la categoría de profesionales de la comunicación, amás de reconocese’l llabor del periódicu dixital Mi Gijón y al periodista Lauren García, destacó la presencia de medios venceyaos a la sidre; Susana Sela, Carme Pérez y Llucía F. Marqués fueron destacaes pol so trabayu como redactores y collaboradores de la revista LA SIDRA, publicación que tamién figuró ente les entidaes reconocíes pola so trayeutoria dientro la categoría de Cultura Sidrera. Amás, nel apartáu de cultura sidrera fueron señalaos los nomes d’Ana María Viciosa “Ciderayalga”, Raúl Moro, de Sidrastur, y Fernando Paredano, responsable de La sidra de papel, polos sos proyectos personales y colectivos.
La esposición Asturies y Transilvania, xuníes pola sidre y la montaña quedó inaugurada al empar de la entrega de premios, proponiendo un percorríu visual pol paisaxe y la cultura de los dos territorios, poniendo de relieve les conexones que comparten.
La gala contó con llectura de poemes y con distintos momentos musicales protagonizaos por músicos y cantautores que s’encargaron d’animar l’actu. Tamién se sirvió una pequeña degustación con productos d’Asturies y Transilvania, que dio pasu a un espaciu d’alcuentru y conversación ente públicu, participantes y entidaes convidaes.
Nel Dos Santos
This work is licensed under a Creative Commons Attribution 4.0 International License.
