El Principáu dio un pasu más na tramitación de los parques Carrocera 1 y 2, dos instalaciones de bateríes previstes ente’l nucleu urbanu de San Martín del Rei Aureliu y el polígonu de La Florida, ensin atender les torgues vecinales nin les alegaciones presentaes nel trámite ambiental

La tramitación d’estos dos parques, ca ún con una potencia prevista de 5 MW y una capacidá d’algo más de cuatro hores d’almacenamientu, avanza. Hai un mes aprobárase la autorización ambiental, y agora ye’l turnu del procesu de conexión eléctrica, lo que confirma la intención del Gobiernu asturianu de siguir p’alantre col proyectu malpenes ensin revisar los reparos presentaos pola Coordinadora Ecoloxista d’Asturies y la oposición municipal.

Dende la Coordinadora llamenten la velocidá con que s’impulsen estes instalaciones nun espaciu marcadamente urbanu, arrodiáu de viviendes, cuando en dalgunes árees d’Asturies esisten llugares ensin población onde podrían allugase ensin xenerar riesgu nin conflictos.

Amás, destaquen que la llista de parques de bateríes en trámite o yá autorizaos nun dexa de xorrecer. Nel conxuntu del país son decenes los proyectos que van saliendo alantre, y la organización ecoloxista considera que la cantidá prevista resulta desproporcionada pa les necesidaes enerxétiques asturianes. A ello súmase’l fechu de que munchos d’esos equipamientos planteguen la colocación de decenes de contenedores con capacidaes d’almacenamientu que podríen algamar varios cientos de MW.

L’alderique principal, sicasí, ciéntrase na cercanía a les viviendes. Les asociaciones vecinales tán especialmente alerta pola posible esposición continuada a campos electromagnéticos y polos efeutos qu’esa proximidá podría tener na salú humana y animal. Esisten investigaciones que venceyen esposiciones intensives con mayor incidencia de distintos tipos de cáncer o afecciones neurolóxiques, un escenariu qu’aumenta la inquietú na zona.

A estos riesgos súmase’l posible comportamientu d’estes bateríes en casu d’incendiu o fuga térmica. Los equipos d’emerxencia saben que los fueos con bateríes d’ion-litio pueden ser d’un control bien complicáu y que, en munches ocasiones, l’agua ye’l únicu mediu verdaderamente eficiente pa la extinción. Esa mesma agua, afiten dende la Coordinadora, podría acabar contaminada por sustancies tóxiques, corrosives o irritantes, con un impactu severu sobre l’entornu y la salú pública.

Nel conxuntu d’Asturies, los proyectos plantegaos nun son pocos: hai dende instalaciones pequeñes con un solu contenedor hasta propuestes que superen los trescientos. La distribución territorial trespasa conceyos de dalguna importancia y llega a decenes de llugares distintos, incluyíos Siero, Llanera, Mieres, Oviedo, Avilés, Corvera, L.lena, Villaviciosa, Gozón, Piloña o Xixón, amás de los dos promovíos en San Martín del Rei Aureliu.

La Coordinadora Ecoloxista alvierte que, de siguir a esti ritmu y ensin modificar criterios d’ubicación, va finar creándose un mapa d’instalaciones que va xenerar conflictos, esmolecimientu sanitariu y un impautu ambiental difícil de xustificar.

Llucía F. Marqués

This work is licensed under a Creative Commons Attribution 4.0 International License.