El discursu institucional plantega el record de cruceristes como un llobru, lo que choca colos costes reales d’un modelu turísticu que malpenes sofita la economia llocal y abonda na saturación turística
Dientro del grave problema de masificación que carez Asturies, el crucerismu constitúi un de los modelos turísticos más precarios y que menos perres dexa nos puntos de parada, al mesmu tiempu que satura los llugares que visita. Los barcos aporten, baxen una marea de pasaxeros con un tiempu bien marcáu pa sacar una semeya nos puntos clave de la ciudá y vuelven darréu a cenar al barcu. El gastu nel destín ye ínfimu y la saturación, notable.
Sicasí, intenta vendésenos como un ésitu’l “récord” previstu pa 2026. Xixón afaya un nuevu techu de pasaxeros, con más de 90.000 cruceristes anunciaos pa esi añu. El Musel prevé recibir 55 escales la próxima temporada, veinte más que les d’esti añu, incluyíu un buque de gama alta y delles navieres que yá consideren fidelizáu’l puertu xixonés.
La Autoridá Portuaria tien cerráu yá un volumen d’actividá que supondría un aumentu del 57 por cientu nel númberu d’escales respeuto al exerciciu actual —35 nesta temporada—, amás d’un ascensu notable de viaxeros: les previsiones sumen 92.974 places, alrodiu d’un terciu de la población xixonesa y un 34 por cientu más que les 69.437 d’esti añu.
Nieves Roqueñí, presidenta del Puertu, defende que esta actividá contribúi “a la proyección de la ciudá de Xixón y al fortalecimientu de la so imaxe como destín turísticu de referencia”, dexando nidio que nun aporta na tanxible, siendo ello que’l beneficiu económicu pa la ciudá ye cuasi inesistente. Nun hai tampocu posibilidá de qu’estes persones conozan la cultura o identidá asturiana nun paséu d’unes hores, asina que los moraores de Xixón ven les sos cais saturaes de guiris faciendo usu de los servicios públicos a cambiu de res.
Llucía F. Marqués
This work is licensed under a Creative Commons Attribution 4.0 International License.
