L’Asociación Drechu a Morrer Dignamente convoca la mesa redonda “40 años de llucha pol drechu a una muerte digna. Retos actuales”, que va celebrase’l llunes 17 de payares a les 18.00 hores na Universidá d’Uviéu (Edificiu Históricu, aula Severo Ochoa).

Nel alcuentru va analizase’l camín percorríu y la evolución llegal, va valorase la so puesta en marcha y van plantegase nuevos retos alredor de les lleis que protexen los drechos de la ciudadanía nel procesu del final de la vida.

Na mesa van participar Loren Arseguet, presidenta de l’Asociación Federal Derechu a Morrer Dignamente-España, que va centrase nel desendolcu de la LORE n’España y na comparanza con normes asemeyaes n’otros países; Roger Campione, catedráticu de Drechu na Universidá d’Uviéu, que va tratar les bases llegales y costitucionales del drechu a una muerte digna; y Fernanda del Castillo, activista de DMD-Asturies, que va desplicar la situación asturiana respeuto al Documentu d’Instruiciones Previes, a la Llei asturiana de Muerte Digna y a la propia LORE. La coordinación va correesponder a Elena Canedo, vicepresidenta de DMD-Asturies.

Dende la organización señalen tamién la presencia en Uviéu, a lo llargo del llunes 17 y del martes 18, de la recién nomada presidenta de l’Asociación Federal Derechu a Morrer Dignamente-España, Loren Arseguet, primer muyer en ocupar esti cargu y una gran conocedora de la realidá internacional de los drechos nel final de la vida.

Susana Sela

This work is licensed under a Creative Commons Attribution 4.0 International License.