L’Academia de la Llingua Asturiana (ALLA), sabiendo’l fondu interés de munches persones en llograr que se reconoza la so conocencia de la llingua, entama periódicamente prebes pa evaluar esi nivel. Gracies a esti procesu, les persones qu’algamen un resultáu d’«aptu/a» van poder certificar el nivel llingüísticu elemental d’asturianu, d’alcuerdu col sistema formativu de la institución
La tercer convocatoria del añu 2025 va cellebrase’l sábadu 13 d’avientu, con llamamientu a les 9.50 h y entamu de la prueba a les 10 h. La duración total ta prevista en dos hores aproximaes y el preciu d’inscripción ye de 20 euros.
Na parte oral, ca participante tendrá de preparar un tema llibre pa esponer nos primeros cinco minutos del esame. Pa llograr un bon resultáu, ye preciso tener un dominiu básicu de les siguientes estayes:
La prueba va valorar distintos ámbitos de la competencia llingüística. Nella van midise la conocencia y el dominiu del furrulamientu gramatical del asturianu, asina como la correición nel emplegu escritural de la llingua a través d’exercicios gramaticales y de composición. Tamién va tenese en cuenta la capacidá d’espresión oral de ca participante, valorada nun diálogu col xuráu calificador. Amás, va evaluase la conocencia del papel que tien l’asturianu dientro de la sociedá y del procesu de normalización llingüística nel que ta inxertu.
L’Academia encamienta la llectura de les Normes ortográfiques (8ª edición, 2021) y de la Gramática de la Llingua Asturiana (3er reimpresión, 2008), amás del contactu con testos publicaos pola mesma institución.
Les matrícules van tar abiertes hasta’l 7 d’avientu y la capacidá ye mui llendada, namás 14 places, polo que l’Academia aconseya matriculase con rapidez.
Van poder presentase persones mayores de 16 años o que los cumplan en 2025. A les declaraes aptes, l’ALLA va espedi-yos un documentu que certifica’l nivel 1 o básicu según los criterios oficiales de la institución.
Susana Sela
This work is licensed under a Creative Commons Attribution 4.0 International License.
