El Serviciu Rexonal d’Investigación y Desendolcu Agroalimentariu (Serida) llidera, dientro’l plan estatal Agroalnext, una docena de proyeutos que busquen tresformar el sector agroalimentariu del país
El campu tuvo siempres un papel esencial na hestoria d’Asturies. Sicasí, nos últimos tiempos esti mundu rural vive un procesu de despoblación y avieyamientu motiváu pola falta de rentabilidá de la ganadería y de la agricultura tradicional, lo que fai cada vez más difícil garantizar el relevu xeneracional y caltener viva la actividá nes aldees. Nesti contestu, proyeutos que sofiten la innovación y la modernización del sector agroalimentariu son clave pa xenerar oportunidaes, recuperar población y asegurar un futuru caltenible pal mediu rural.
El Serviciu Rexonal d’Investigación y Desendolcu Agroalimentariu (Serida) xuega un papel decisivu nesti cambéu. Dientro’l plan estatal Agroalnext, l’organismu asturianu llidera una docena de proyeutos que busquen tresformar el sector agroalimentariu del país. Estes iniciatives, que sumen una inversión autonómica d’un millón d’euros, apuesten pola dixitalización, la caltenibilidá y la investigación aplicada, ferramientes imprescindibles pa facer del campu un espaciu económicamente viable y socialmente atractivu.
El programa presentóse el vienres pasáu y cuntó cola participación del conseyeru de Ciencia, Industria y Emplegu, Borja Sánchez, la direutora xeneral del Serida, Mamen Oliván, y personal investigador. Sánchez destacó que Asturies ye güei una referencia estatal na investigación agroalimentaria, gracies a la combinación ente conocencia científica, innovación teunolóxica y cooperación público-privada.
Dientro de los proyectos destaca’l esfuerzu del Serida por xuntar tradición y futuru. Transfer-Escanda trabaya pa recuperar variedaes tradicionales d’esi cereal emblemáticu de la cultura asturiana y dar-y una segunda vida nel cultivu comercial. Pela so parte, Apple-Best investiga nueves variedaes de mazana más resistentes al cambéu climáticu, asegurando la continuidá d’un productu clave na economía sidrera.
Nel campu tecnolóxicu sobresalen Smart-Grazing, que incorpora sistemes de pastoreu intelixente con collares electrónicos y vallados virtuales, y Agrodata, un espaciu dixital basáu en IoT y intelixencia artificial p’ameyorar la rentabilidá de la mazana de sidra. La innovación algama tamién al mundu apícola con Honey-Track, que emplega espectroscopía NIR pa garantizar l’autenticidá de la miel asturiana.
Nun plan más esperimental, el Serida ta aprovechando espacios mineros en desusu, como les galeríes del antiguu Pozo Carrio, en Llaviana, pa cultivu de plantes sostenibles, una manera de reconvertir el patrimoniu industrial en territoriu agrariu productivu.
Amás, el organismu creó’l Serida-Hub de Tresferencia, una plataforma que tien como fin estrechar la conexón ente la investigación científica y les explotaciones agraries, pa que’l conocimientu y la innovación lleguen direutamente al campu.
Gracies a esti impulsu, Asturies pue avanzar escontra un modelu agrariu y ganaderu más competitivo, caltenible y intelixente, onde la innovación sirva de motor pa reactivar el campu y devolver vida a los pueblos.
Llucía F. Marqués
This work is licensed under a Creative Commons Attribution 4.0 International License.
