La Pola Siero va acoyer mañana, 13 payares, un campeonatu singular dedicáu al anís casero de guinda. La cita, que va cellebrase nel restaurante Abrelatas, axunta alredor de 40 participantes de distintos conceyos d’Asturies y quier reivindicar una tradición que yera común en munches cases y chigres del país
El certame entama a les 16.00 hores y va incluyir la tastia de los anises por parte d’un xuráu, un showcooking con David Montes, un conciertu de Carlos Velasco y Chino El Indio y, como colofón, una subasta simbólica cola guinda ganadora.
La iniciativa surde col enfotu de recuperar un vezu que foi percarauterística de la vida asturiana, cuando nun yera raro que nes cocines familiares siempre hubiera una botella d’anís caseru. Esti llicor, consideráu por munchos como un símbolu d’identidá, foi desapareciendo col pasu de los años, y les restricciones llegales sobre la ellaboración d’alcohol acabaron por facer menguar la so presencia.
L’oxetivu del campeonatu ye tamién facer llegar esta tradición a les xeneraciones más nueves. Dende l’organización deféndese la idea de que l’anís representaba un momentu de xunta y conversación alredor de la mesa, una imaxe que se quier recuperar frente al individualismu de les pantalles.
Nesta primer edición, la competición caltién el so espíritu artesanal: namás se permite la participación de particulares, ensin presencia de profesionales nin productores comerciales. Los concursantes proceden mayoritariamente del área central, pero tamién habrá representantes del oriente y del occidente, incluyendo algún participante de Tinéu.
El campeonatu d’anís caseru d’El Abrelatas ñaz con vocación de facer de la tradición un motivu de celebración y de poner en valor un sabor fondamente venceyáu a la memoria gustativa d’Asturies.
Nel Dos Santos
This work is licensed under a Creative Commons Attribution 4.0 International License.
