El gaiteru Diego Lobo Tuñón proclamóse ganador del II Concursu de Gaita Asturiana “Manuel y Antón de Cogollu”, cellebráu en Les Regueres dientro del Certame de la Castaña Valduna. La cita sirvió tamién pa rindir homenaxe a dos de los luthiers más influyentes na historia de la gaita asturiana
L’eventu, entamáu pol Conceyu de Les Regueres y la Asociación de Baile y Música Tradicional La Xordia, sirvió pa remembrar la figura de Manuel y Antón de Cogollu, artesanos regueranos reconocíos pola so maestría na construcción de gaites. La so obra, marcada pola busca d’un soníu propiu ya identificativu, foi oxetu d’investigación en trabayos como’l de Fonso Fernández y Pelayo Fernández, presentáu en 2019.
Nel concursu, los participantes tuvieron d’interpretar como pieza obligatoria “El Floréu de Remis”, según la versión grabada en 1968 pola discográfica Columbia nel álbum Música Popular Asturiana; El mago de la gaita asturiana, José Remis Ovalle. Amás, cada gaiteru presentó una segunda pieza de llibre escoyeta perteneciente al repertoriu tradicional asturianu.
Tres la valoración del xuráu, Diego Lobo Tuñón proclamóse vencedor, siguíu mui de cerca por Álvaro Cueto Cueto, que algamó’l segundu puestu, y Nel Cortizo Verdejo, que completó’l podiu. Pelayo Suárez Rodríguez ocupó la cuarta posición, Diego Fernández Fernández la quinta, Moisés Cuetos Viego la sexta y Pablo del Cuadro Crespo la sétima.
Los premios incluyeron 300 euros, diploma y punteru pal primer clasificáu; 200 euros, diploma y punteru pal segundu; 150 euros, diploma y punteru pal terceru; 100 euros y diploma pal cuartu; y 75 euros y diploma pal quintu.
El Concursu “Manuel y Antón de Cogollu” consolídase asina como una cita destacada pa la gaita asturiana, al tiempu que caltién viva la memoria d’un oficiu artesanal que marcó la identidá musical d’Asturies.
Susana Sela
This work is licensed under a Creative Commons Attribution 4.0 International License.
