El problema del accesu a la vivienda ye ún de los principales factores que condicionen la vida de la mocedá asturiana. Nun territoriu que sigue perdiendo población moza dende hai más d’una década, la posibilidá d’emancipase ye cada vez más llonxana, non solo pola precariedá llaboral, sinón tamién pol encarecimientu continuu de los alquileres
Los datos oficiales del Principáu d’Asturies y del Observatoriu de la Emancipación Xuvenil son contundentes: con un salariu mediu de 1.032 euros mensuales, un mozu o moza tien d’enfrentase a un alquiler que ronda ente los 750 y los 900 euros al mes. Amestando los suministros básicos —lluz, agua, gas y basoria—, que sumen otros 80 a 110 euros, la suma ye que la mocedá gasta la práutica totalidá del so sueldu namás en vivienda. Esos datos puen estendese a tola población asturiana, pero ye la mocedá la que carez d’emplegos pior pagaos.
La consecuencia d’esa ecuación ye bien clara: menos del 17 % de los mozos y moces asturianes vive fora de la casa familiar, y eso mesmo inclúi a xente con trabayu estable. Los salarios baxos y la falta d’una ufierta pública d’alquiler asequible son los principales factores que torguen l’emancipación xuvenil, qu’en términos porcentuales ye una de les más baxes del Estáu.
La situación ye particularmente grave nes grandes ciudaes, onde los precios algamen les cifres más altes. En Xixón y Uviéu, los alquileres d’un pisu d’un dormitoriu superen de media los 800 euros, ensin contar gastos añadíos, mentanto que en Avilés la cifra ronda los 700. Na zona rural la situación nun ye necesariamente meyor: aunque los precios baxen ligeramente, la escasez d’ufierta, el deterioru del parque inmobiliariu, la competición coles cases turístiques y la falta d’infracadarmes de comunicación y servicios públicos faen que la mocedá nun vea nel campu una alternativa real.
A esto hai que sumar que n’Asturies esisten más de 100.000 viviendes vacíes y alredor de 77.000 d’usu esporádicu, menos de tres meses al añu. La concentración d’esos inmuebles vacios nes zones más poblaes ye evidente: barrios enteros de Xixón y d’Uviéu caltienen viviendes ensin usar, ente que la demanda xuvenil crez ensin que’l mercáu nin les polítiques públiques den una respuesta eficiente.
Los planes autonómicos d’ayuda al alquiler y d’accesu a vivienda pública resulten, magar necesarios, insuficientes. Les sovenciones lleguen tarde y algamen una parte bien pequeña de la población, mentanto que’l parque públicu de vivienda sigue siendo residual ya infrautilizáu. A lo llargo de los últimos años, el Gobiernu asturianu anunció distintos programes pa rehabilitar inmuebles vacíos y ponelos a disposición de la mocedá, pero la tramitación llento y la falta d’inversión fixeron que munches d’eses iniciatives quedaren en mera intención.
L’efectu de los pisos turísticos vien complicar entá más la ecuación. En Xixón, onde se rexistren más de 1.400 pisos d’usu turísticu según datos municipales de 2024, munchos barrios tradicionales vieron cómo los precios del alquiler subíen más d’un 25 % en solo cinco años. Esa dinámica ta tresformando’l mapa social y prevocando que munchos vecinos tengan que abandonar los sos barrios onde viven dende xeneraciones.
Dende Andecha Astur, Asturies Insumisa y otros coleutivos sociales reclamen midíes que vayan más allá de los planes testimoniales. Pa ellos, la solución pasa pola movilización de les viviendes vacíes, l’establecimientu de precios máximos d’alquiler n’árees de tensión, la creación d’un parque de vivienda pública que funcione al marxe de los intereses privaos y la contención del fenómenu de los pisos turísticos. Pero, sobre too, paez imprescindible un cambiu de visión institucional: tratar la vivienda non como una mercadería, sinón como un derechu social.
La realidá actual amuesa una paradoxa difícil d’asumir: una mocedá con niveles de formación los más altos de la historia enfréntase a una precariedá estructural que-y torga fundar un futuru independiente, redundando de pasu en dos fenómenos que lleven tiempu esmoleciendo n’Asturies: la cayía de la natalidá ya’l xorrecimientu de la emigración.
Dende Andecha Astur alvierten “Si nun s’actúa con urxencia, Asturies arríscase a siguir perdiendo población moza y capacitada, alimentando un ciclu d’avieyamientu y desigualdá qu’afecta tanto a les ciudaes como al mundu rural. Porque más allá de los númberos, cada pisu vacíu ye una oportunidá perdida pa construyir un país onde la mocedá pueda vivir, trabayar y suañar ensin tener que marchar”.
Nel Dos Santos
This work is licensed under a Creative Commons Attribution 4.0 International License.
