La villa de Candás prepara una cita clave pa la cultura en llingua asturiana. Del 14 al 16 de payares llega  la cuarta edición del Reguerada Fest, un festival que xune empresa, cultura y creación n’asturianu

El Reguerada Fest rinde tributu a Antón de Marirreguera, natural del conceyu de Carreño y autor de la que se considera la primer obra literaria conservada n’asturianu

La Fábrica d’Ortiz, en Candás, va ser’l centru neurálxicu del festival. Allí tendrá llugar’l mercáu de llibros y d’empreses que trabayen n’asturianu, charres, recitales de poesía, talleres de creación y actividaes dirixíes a la xente más mozo y al públicu familiar. 

Destaca’l concertu de los grupos asturianos Ferla Megía y Herbamora, que darán voz a la creación musical contemporánea n’asturianu. Los talleres contemplen tamién la iniciación al baille tradicional, creación de xuegos de mesa, reconocimientu de la cultura oral, un showcooking y visites guiaes por Candás pa conécelu más a fondu. 

Un distintivu importante del Reguerada Fest ye la implicación del mundu empresarial que trabaya n’asturianu. Representa una oportunidá pa reforciar la presencia del asturianu como vehículu de creación, empresa y identidá. La combinación de cultura tradicional, moderna, música, empresa y participación xenera un espaciu multicapa que favorez l’usu de la llingua n’ámbitos tantu formales como informales.

Susana Sela