La retirada del proyectu mineru de Salave como Proyectu d’Interés Estratéxicu Rexonal (PIER) confirma la inviabilidá d’una iniciativa contestada dende va venti años polos vecinos

La Plataforma Oru Non cellebró la noticia conocida pola prensa según la cual Exploraciones Mineras del Cantábrico —filial de Black Dragon Gold— retiró la solicitú pa que’l so proyectu mineru en Salave  fore declaráu Proyectu d’Interés Estratéxicu Rexonal (PIER). La empresa alega motivos de reorganización accionarial tres la incorporación de nuevos inversores asturianos, anque too paez indicar que la retirada débese a una resolución contraria a los sos intereses.

Tamos agora a la espera de que la noticia se faiga oficial y de conocer en qué términos se presenta. De confirmase, sedría una excelente noticia que reafirma lo que se lleva dos décades denunciando: que’l proyectu ye inviable dende tolos puntos de vista y que, llonxe de ser estratéxicu, representa xusto lo contrario.

El proyectu ye illegal, porque incumple delles normatives y lleis; y tamién ye claramente destructivu pal mediu ambiente, amás de perxudicar direutamente’l desendolcu socioeconómicu de la contorna.

Dende la Plataforma indiquen que “too apunta a una decisión meramente táutica pa maquillar l’enésimu varapalu al proyectu y el descréitu creciente ente la comunidá inversora”. Les noticies destaquen la incorporación d’inversores asturianos al accionariáu de la empresa, pero esti fechu, seya cual seya la so procedencia —asturianos, australianos o canadienses—, nun cambia la naturaleza illegal y destructiva del proyectu.

Llucía F. Marqués

This work is licensed under a Creative Commons Attribution 4.0 International License.