El Grupu Folklóricu L’ Alegría de Porceyo anuncia la celebración d’una nueva edición de “La Esfoyaza”, un eventu tradicional asturianu que busca caltenese como espresión viva de los vezos rurales d’Asturies. La cita va celebrase Tendayu del Muséu del Pueblu d’Asturies el próximu sábadu 8 de payares, de magar les 17:00 hores
“La Esfoyaza”, que tradicionalmente consistía na xunta de los vecinos pa desfoyar les panoyes de maíz y preparar les riestres, combina esta llabor ancestral con música, baille y gastronomía tradicional.
L’actu va tar presentáu por Laude Martínez (TPA) y nel so programa inclúyese canción asturiana, monólogu, pequeñu teatru asturianu, bailles y xuegos tradicionales. El fin de fiestes va tar acompañáu pola actuación musical de Ferla Megía, a la lluz de la sidra.
Los asistentes van poder disfrutar de productos típicos del seronda, como sidre duce, tortos con picadillu, castañes, frisuelos y farrapes, nun ambiente festivu y familiar.
“Tamos mui ilusionaos con revivir esta tradición un añu más nun entornu tan especial como’l Tendayu”, comentó María Soledad Martín, presidenta del Grupu Folklóricu L’Alegría de Porceyo. “El nuesu oxetivu ye que les nueves xeneraciones conozan y valoren les nueses raíces; ‘La Esfoyaza’ ye una oportunidá perfecta pa facelo d’una manera divertida y participativa”.
La entrada al Muséu del Pueblu d’Asturies va ser de baldre, y ta abierta a tola ciudadanía interesada n’asistir a esta xornada de cultura y tradición asturiana.
Fundáu en 1972, el Grupu Folklóricu La Alegría de Porceyo ye una asociación dedicada a la recuperación, enseñanza y difusión del folclor y les tradiciones d’Asturies. A lo llargo de la so trayeutoria, participó en numberosos festivales y eventos, tanto a nivel llocal como internacional, llevando la cultura asturiana a públicos de diversos llugares.
Susana Sela
This work is licensed under a Creative Commons Attribution 4.0 International License.
