Como ca añu, la Coordinadora Asturiana d’ONGD (CODOPA) entama’l ciclu de cine Por ser muyeres, que nesta edición de 2025 va desendolcase pente Uviéu y Xixón a lo llargo del mes de payares, coincidiendo col mes dedicáu a la llucha contra la violencia de xéneru

Les proyeiciones van celebrase los díes 3, 10, 17 y 24: nel Teatru Filarmónica d’Uviéu a les 20:00 hores y nel Centru Municipal Integráu d’El Llano, en Xixón, a les 19:00 hores. L’entrada va ser de baldre hasta completar l’aforu.

El ciclu, nacíu en 2008 al calor del Grupu de Feminismos y Xéneru en Desarrollu de la CODOPA, tien como oxetivu espublizar ente la sociedá asturiana la realidá de les muyeres nel mundu. Una realidá que, pola so persistencia, sigue siendo estremecedoramente común: les muyeres sufren discriminaciones n’aspectos bien diversos, simplemente por ser muyeres.

Nesta nueva edición, les películes van faer viaxar al públicu dende Afganistán hasta Arxentina, pasando por Bangladesh y Costa Rica. Cuatro històries que, a pesar de la distancia cultural o xeográfica, comparten un mesmu filu conductor: la desigualdá y la resistencia femenina. Les proyeiciones inclúin títulos como La canción de Sima, Rehana, La neña de tacones mariellos y Memories d’un cuerpu qu’ambura, combinando ficción y documental pa amosar los retos cotidianos de les muyeres nel planeta.

Dende la organización destácase que Por ser muyeres ye una cita pa reflexonar, pero tamién pa sentir, porque los protagonismos que presenta —inesperaos y, a vegaes, doliosos— impacten y emocionen al mesmu tiempu. La programación d’esta edición promete, una vegada más, una mirada comprometida y humanamente necesaria sobre la condición femenina contemporánea.

Llucía F. Marqués