Mediu centenar de persones aconceyaron ayeru pa visibilizar la violencia contra les muyeres y que nun s’escaezan les 73 víctimes asesinaes esti añu “Ca vegada qu’una muyer ye asesinada incluso depués de denunciar, el sistema falla”
73 persones, pente muyeres y los sos fios y fies víctimes de violencia vicaria, con edaes pente los tres y los 93 años, cuatro d’elles n’Asturies; esi ye’l cómputu d’asesinatos a mes d’ochobre, una cifra perasemeyada a la del añu anterior nestes feches, demostrando que nun hai avance na protección de les muyeres.
La concentración que ca caberu miércoles de mes refuga les violencies machistes en Xixón, delantre l’edificiu de La Gota Llechi pa denunciar les consecuencies del patriarcáu y de la violencia contra les muyeres, tuvo encabezada por una pancarta que contabiliza esi macabru 73, una cifra que nun apara de medrar faciendo rescamplar la inutilidá de les midíes tomaes fasta’l momentu pa finar con esti problema, como fexo notar la representante de l’Asociación de Pensionistes de Xixón. Na so intervención tuvo tamién pallabres pa la violencia vicaria “una de les formes más estremes de la violencia de xéneru”, destacó la ineficiencia pa evaluar situaciones del actual sistema de valoración de riesgos del VioGen, sistema qu’acuso de deshumanizar situaciones límite “sigue priorizándose la tecnoloxía sobre la empatía, la estadística sobre la experiencia” destacó. Finalmente dedicó les sos pallabres a les munches muyeres mayores que carecen violencia de xéneru “una violencia oculta, perpetrada a lo llargo de los años, que d’alguna mena ta socializada y normalizada”, remanando datos respigantes, comu que’l 67% de les muyeres de más de 65 años lleven careciendo violencia de xéneru demientres 20 o más años.
Finalmente lleéronse los nomes de les víctimes d’esti añu en fondu silenciu y emplazóse al 26 de payares pa la prósima concentración, deseyando que’l contador nun medre. Los convocantes son la Plataforma Stop Violencies, qu’acomuña a les organizaciones Andecha Ástur, Anticapitalistes, Amamantar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Llucía F. Marqués
This work is licensed under a Creative Commons Attribution 4.0 International License.
