Cuando entá tamos respigaos pol reciente fallecimientu d’un trabayador en Gozón, aporta la noticia d’otra muerte, un agricultor nesti casu, al que-y volcó’l tractor el mesmu día qu’un mozu ingresa feríu de gravedá tres de volca-y un dumper

Va menos d’una selmana del accidente que-y costó la vida a un trabayador de 59 años, al precipitase dende’l teyáu d’una ganadería nel conceyu de Gozón. Güei recibimos la noticia d’otru acidente mortal: un home de 52 años perdió la vida al volcar col tractor que conducía y cayer per un desnivel, en Llanes, el mesmu día qu’un rapaz de venti años yera feríu de gravedá tres volcar el dúmper col que trabayaba nes xeres de restauración d’en una mina en Tormaleo, conceyu d’Ibias.

Amás de la conmoción social, estes llaceries espeyen la esistencia de riesgos evitables nos llugares de trabayu, remembrando que la siniestralidá llaboral sigue ensin solución efeutiva en Asturies.

Yá anantes d’estos tres accidentes sindicatos ya informes oficiales alertaben d’un repunte de la mortalidá llaboral y d’un espoxigue d’accidentes graves en sectores concretos. L’Organización Sindical (USO Asturias) informaba de 10.406 acidentes llaborales hasta’l mes de mayu (caberu del que se tienen datos), de los que 37 foron graves y once mortales. El sindicatu y señala tamién l’apertura de centenares d’expedientes pola Inspección de Trabayu qu’apunten a incumplimientos en prevención, datos que confirmen que munches muertes nun son “accidentes” casuales, sinón resultatos d’una combinatoria de precariedá, falta d’inversión en prevención y deficientes controles.

Denuncies  de sindicatos y espedientes de la Inspección apunten a carencies en formación práctica, falta d’equipos de protección individual, planes de seguridá desactualizaos y ausencia de supervisión efectiva nel puestu de trabayu. 

Llucía F. Marqués

This work is licensed under a Creative Commons Attribution 4.0 International License.