La direutora y periodista María Torrellas va presentar mañana nel Palaciu de Camposagráu, Avilés el so documental “Cubanes: guardianes de la Revolución”
La defensa de la dignidá y la resistencia frente al bloqueu van ser el filu conductor de la proyeición del documental Cubanes: guardianes de la Revolución, de la periodista y direutora arxentina María Torrellas, que va presentase esti martes 28 d’ochobre, a les 19:00 hores, nel Palaciu de Camposagráu d’Avilés (entrada pela Cuesta La Molinera).
L’actividá ta entamada pola Asociación Hispano-Cubana Paz y Amistad, y enmárcase dientro del Alcuentru de Muyeres promovíu por Soldepaz Pachakuti, un espaciu que cada añu visibiliza procesos de llucha, solidaridá y cooperación internacional con perspectiva feminista.
El documental de Torrellas afonda na vida de muyeres campesines cubanes, guardianes d’una identidá y una memoria revolucionaria que se caltién, más allá de los años y de les dificultaes económiques. Amás, rescata los testimonios d’aquelles muyeres que participaron na clandestinidá, arriesgando la vida nos tiempos de la dictadura de Batista.
Dempués de la proyeición, la propia María Torrellas participará nun alderique abiertu col públicu, nel que se reflexonará sobre los aspeutos históricos y humanos recoyíos na obra, y tamién sobre la situación actual de Cuba, suxeta a un bloquéu económicu y políticu calificáu d’ilegal pola comunidá internacional.
La xornada promete ser un espaciu pa l’intercambiu y la conciencia crítica, destacando la relevancia de les voces femenines que, dende distintos ángulos, continúen sosteniendo l’espíritu revolucionariu cubanu y la defensa de la soberanía de la islla.
Susana Sela
This work is licensed under a Creative Commons Attribution 4.0 International License.
