Llucía F. Marqués
Por más que quieran, non, nun somos súbditos; non, nun somos españoles; non, nun aceutamos una monarquía impuesta a sangre y espada por un Estáu colonialista que quier siguir viviendo nel medievu
Lo que se vive estos díes n’Asturies nun ye sinón un llamentable actu de pleitesía tresnochada a unes figures anacróniques, nel que —antroxáu de reconocimientu internacional a terceres persones— se mos pide que afinquemos rodía ante unos personaxes que, si nun representaren tantu dañu, sedríen hasta graciosos de puro ridículos.
Los Premios, entamaos por una fundación corrupta, el patronatu de la Fundación Princesa, onde tán les grandes fortunes d’España y dalgunos de los más direutos responsables de la crisis económica que carecemos, pagaos por tolos asturianos, pretenden dar puxu y credibilidá a la monarquía española n’Asturies: una casa rial corrupta, qu’ocupa poder namás por ser heriedera del franquismu y que perpetúa los roles de la más rancia tradición española.
Poro, ye cuasi un deber participar na concentración que tendrá llugar esta tardi, de magar les 17:30 hores, na Plaza La Escandalera d’Uviéu, de manera que’l recibimientu a los reis d’España na entrega de los Premios Principiegos se torne n’espeyu del refugu a la monarquía española, refugu que ye, como amuesen les encuestes, mayoritariu ente’l pueblu asturianu. Porque nun queremos ser “Principado” nin “Comunidá Autónoma” nin “Provincia” nin “Región”, República Asturiana darréu.
This work is licensed under a Creative Commons Attribution 4.0 International License.
