El festival Artístiques va cellebrase’l 29 de payares en Kuivi Almacenes (Uviéu) y va acoyer la 1ª Muestra d’Asturianada Electrónica, un proyectu pioneru que xune tradición y creación contemporánea dientro d’un programa dedicáu a la creación cultural moza y femenina.
Entamáu por Puru Remangu y Ixuxú Cultura, Artístiques combina artes escéniques, música y artes plástiques, y xunta a muyeres moces que usen la llingua autóctona como idioma d’espresión artística. El festival carauterízase, amás, pol encargu d’obres inédites, un de los eixos principales de la so propuesta.
La asturianada, xéneru musical más identitariu d’Asturies, enfrenta dende hai años la falta de relevu xeneracional y la escasa renovación temática nes sos lletres. Pa facer frente a estos retos, el festival encargó la creación de seis pieces orixinales a cantadores, productores de música electrónica y escritores. El resultáu va poder escuchase nesta muestra, que busca actualizar los mensaxes de la tonada, atraer al públicu mozu y fomentar la continuidá del xéneru.
Les cantadores Alicia Villanueva (Bimenes, 2000) y Lucía Rojo (Mieres del Camín, 2002) son les protagonistes d’esta primer edición. Villanueva participa xunto col dúu electrónicu Llevólu’l Sumiciu y la escritora Blanca Fernández (Bimenes, 1994), ente que Rojo colabora col productor Fruela 757, la escritora y música Marina Pangua (Uviéu, 1992) y la poeta y música Ánxela Gómez d’Ávila (Avilés, 1991). Les dos cantadores firmen tamién una de les trés lletres que van interpretar, con temes que xiren al rodiu de la mocedá, el feminismu y la diversidá llingüística, pilares del espíritu d’Artístiques.
El festival ufierta un programa ampliu nel que tamién participen artistes de Galicia y Euskadi, colos conciertos de Catuxa Salom (gallegu) y Süne (euskera). Nel ámbitu de les artes escéniques van presentase les pieces de Xana Llaneza (danza), Paula Mata (monólogu poéticu-escénicu), Carmen Capellá (microteatru) y la performance conxunta d’Adriana Yáñez, Nora Junquera y Julia Azcano, alumnes de la ESAD.
La parte d’artes plástiques va cuntar cola creación en direutu de María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero, amás de les estudiantes Raquel Mañana (ESAPA) y Lucía Álvarez (Escuela d’Arte d’Uviéu).
Artístiques va cellebrase’l sábado 29 de payares a partir de les 19:00 hores en Kuivi Almacenes, con entrada de baldre. L’eventu promete ser un alcuentru innovador ente tradición y vangarda, nel que la asturianada se reiventa dende la mirada y la voz de les xeneraciones más nueves.
Susana Sela
This work is licensed under a Creative Commons Attribution 4.0 International License.
