Dende la Fundación Asturies XXI, organizadores del eventu, resáltase la vocación educativa, inclusiva y cultural del programa, que busca fomentar el respetu pol patrimoniu asturianu y el sofitu a la integración escolar a través d’una actividá participativa, divertida y con conteníu pedagóxicu.
El próximu 21 d’ochobre, el complexu esportivu Les Mestes va acoyer la celebración del Sidrocole del Díi Internacional de la Mazana, una xornada educativa y llúdica que cuenta col sofitu de la Conseyería de Cultura d’Asturies.
L’eventu, que va desendolcase ente les 9:30 y les 12:15 hores del martes, incluirá talleres prácticos y xuegos alredor de la mazana, con participación activa del alumnáu. L’oxetivu principal ye averar a la reciella al valor saludable y cultural de la mazana y la sidre, promoviendo al mesmu tiempu la convivencia ente escolares d’estremaos distintos centros y realidaes educatives. Participarán varios colexos del conceyu de Xixón, ente ellos el Sanatoriu Marítimu, dientro de la estratexa d’integración que desendolca la Fundación Asturies XXI.
La fundación destaca que la xornada ta encadarmada en diversos talleres temáticos, como la siembra de pebides, los xuegos tradicionales cola mazana, la mayada y ellaboración de sidre’l duernu o deprender a echar sidre -con agua-. Los neños participarán por grupos, acompañaos polos sos profesores y monitores especializaos con esperiencia en talleres de Sidrocoles. Darréu de la rotación de talleres, los escolinos van poder degustar sidre dulce recién mayada, elaborada por ellos mesmos.
El programa refuercia les directrices de la UNESCO sobre la enseñanza de la Cultura Asturiana de la Sidre, declarada Bien Inmaterial de la Humanidá.
Susana Sela
This work is licensed under a Creative Commons Attribution 4.0 International License.
