El sindicatu d’enseñanza SUATEA alertó de la esistencia de riesgos sicosociales nel IES Roces, aludiendo a una imposición férrea por parte del equipu directivu de determinaes formes de trabayu, y abogó porque Inspeición Educativa exerza un papel mediador nel conflictu
Dende’l centru tresmitieron que lo denunciáu por SUATEA ye “completamente falso, demostrable conforme a la llei y al proyectu educativu”, y refugaron la acusación de “tar privatizando la enseñanza”, pero agora un grupu de 35 exprofesores del IES Roces de Xixón, ente los que se cuenten más d’una docena d’exxefes de departamentu, asoleyaron un comunicáu nel que manifiesten el so sofitu total a les denuncies sindicales sobre la situación de trabayu y convivencia nel centru educativu.

Les persones firmantes trabayaron nel IES Roces a lo llargo de distintos cursos nos que Begoña Seijo Marcos y Natalia Carballo Holgado formaron parte del equipu directivu. La primer exerció como directora dende 2018 y la segunda, primero como xefa d’estudios axunta y darréu como xefa d’estudios. Nel testu, los exprofesores resalten que el clima llaboral nel centru deterioróse notablemente dende la llegada del nuevu equipu directivu y remembren que, enantes de 2018, la convivencia y el trabayu yeren positivos, con un ambiente profesional respetuosu y colaborativu.

Nel comunicáu espónse que el modelu de dirección caracterizóse pola imposición constante de decisiones, la falta de xestión democrática y la obligación de participar en programes del centru ensin posibilidá d’escucha nin flexibilidá. Estes circunstancies, añaden, provocaron un ambiente llaboral tenso y desaniciador, que derivó nel treslláu continuu de profesores hacia otros centros educativos.

Los firmantes señalen que, ante la difusión pública de les denuncies sindicales, sienten el deber de dar testimoniu de la so esperiencia direuta y sofitar públicamente al profesoráu y a los sindicatos que vienen denunciando una situación que, según afirmen, “convertió’l díi ente díi nel centru n’un escenariu cuasi imposible”.

Susana Sela

This work is licensed under a Creative Commons Attribution 4.0 International License.