La guerra en Palestina nun terminó. Quiciabes visti dalguna noticia o titular que daba esa impresión, pero lo cierto ye que el conflictu sigue activu. Les manifestaciones d’ayeri (ente la que cuntamos la de Xixón, con miles de participantes) foron precisamente pa denunciar que la situación humanitaria sigue siendo gravísima: bombardeos, disparos, fame extrema, desplazamientos masivos y miles de civiles ensin proteición.
La desinformación ta consiguiendo tracamundiar a parte de la población, faciendo ver que “la guerra en Palestina finó”, lo que pa munchos contrastaba cola fuelga xeneral y protestes d’ayeri. Queremos esclariar esi puntu.
La xente manifestóse pa revindicar un altu’l fueu permanente (non temporal), que se respete’l drechu internacional y qu’haiga responsabilidaes polos crímenes de guerra. Que se devuelvan los territorios a los palestinos y se garantice’l so drechu a vivir na so tierra ya en paz. Que tolos gobiernos paren la venta d’armes y los fondos que contribúin al conflictu. Pero pa entamar, que se cumpla el de por si mísere “plan de paz” cacarexáu polos EEXX y que nin ye suficiente nin ta cumpliéndose. Nin 24 hores entardó Israel en francer les condiciones de la primer fase.
L’altu’l fueu lleva rexistraes cientos de violaciones, según datos d’organismos internacionales. La falta d’accesu humanitariu sigue siendo un problema grave. L’ONU y diverses ONG piden l’apertura total de los pasos fronterizos pa facilitar el pasu llibre de suministros y voluntarios y evitar una nueva crisis sanitaria y alimentaria nel enclave, pero Israel ya informó oficialmente de que va dexar entrar la metá d’alimentos y melecines de lo alcordao nel pautu.
Les noticies que lleguen de Gaza falen de Palestinos desarmaos asesinaos intentando llegar a casa, de camiones d’aida humanitaria paraos nes fronteres, de decenes de calabres devueltos con ñicios evidentes de tortura -la mayoría irreconocibles- de 8.800 palestinos nes cárceles israelines, incluyendo 440 rapacinos y rapacines y 85 muyeres, amás de dellos miembros de les flotines internacionales qu’enta nun foron devueltos a casa.
En resume, la tregua en cuestión nun ye un “fin de la guerra”, ye un “altu el fuéu” nel qu’allargar la famina y dexar que “l’enemigu”, ello ye, la población civil gazatí, muerra de fame y enfermedaes. Tou ello xustifica llargamente que continuen les protestes y la presión internacional contra l’estáu d’Israel y desplica plenamente la fuelga y manifestaciones d’ayeri.
Nel Dos Santos
This work is licensed under a Creative Commons Attribution 4.0 International License.
