Dende Andecha Astur denuncien la campaña como un remiendu del gobiernu pa tapar, con perres de tolos asturianos, el fracasu del so apueste pol turismu como solución económica p’Asturies
De magar el 16 de setiembre y fasta’l cincu d’avientu el Principado regala bonos a metá de preciu pa que vengan turistes… pagando nosotros
“Asturies quier ser vivida en primera persona: esconsoñar nuna casa d’aldega arrodiada de montes, dexar que la suave llume’l riscar se cuele peles cortines d’una ventana, almorzar pan recién fecho con mermelada casero y pasar la mañana pasiando per paisaxes esceicionales” Esto ye lo que promete’l nuevu Bonu Turismu Rural d’Asturies, una invitación a “desconectar pola mitá de preciu”.
Suena guapo, pero la ufierta tien una cara menos romántica: el braeru coste acaben pagándolu los mesmos asturianos, los mesmos que lleven décades pidiendo’l fin del turismu invasivu y masificáu.
Acordies la web oficial del programa, ca viaxeru paga 75 € por un bonu que tien un valor de 150 €; la otra metá ponla l’alministración del presupuestu xeneral, ello ye, de los impuestos de tolos asturianos. Pa ello’l Gobiernu d’Asturies aprebó una partida de 600.000 €
La idega véndese como impulsu al sector, “pero en realidá ta sirviendo pa tapar un problema estructural, y ye que’l turismu nun despega, nun ye la panacea prometida y les cifres d’ocupación dexen munchos furacos. En llugar de reconocer esi fracasu, el Principáu presenta pa disimular esti bonu y que la xente qu’invirtió en montar cases rurales fiándose de la promesa de multitudes nun se decate del engañu” declaren dende Andecha Astur. Per otru llau denuncien el desdexamientu y desaniciu del restu de sectores productivos “ciéntrandose nuevamente nel sector más endexe, vulnerable a crisis, dañín pal entornu y que crea los trabayos más precarios”.
Lo que paez más claro ye’l réditu políticu: una campaña vistosa, con cartel y titular fácil, que permite vender “éxitu” mentanto se desvía’l gastu públicu a manes privaes y al sector mimáu pola alministración.
Dende Andecha Astur acusen al gobiernu de facer propaganda política a cargu de toos quieren que quede claro qu’esto nun ye un regalu, ye una política pública con coste pa tolos asturianos; una bones el proyeutu ya ta en marcha, desixen que se faigan públicos los datos d’impactu: cuántos bonos se usen, por quién, a quien van aparar los beneficios, en qué conceyos y con qué resultaos reales a llargu plazu.
“Los enfotos d’Asturies nun pueden tar puestos namás nel turismu, hai que sofitar el restu de sectores. Per otru lláu el turismu rural asturianu precisa planificación, diversificación y apoyu real pa facer d’elli un turismu de calidá nel que los sos beneficios reviertan na población asturiana, non campañes estacionales pa salvar la imaxe d’un gobiernu en busca de titulares y pagando del bolsu de los asturianos”.
Nel DSF
This work is licensed under a Creative Commons Attribution 4.0 International License.
