Andecha Astur cellebrará esti 12 d’Ochobre l’actu tradicional nel cimenteriu de Pando en memoria de Belarmino Tomás, presidente del Conseyu Soberanu d’Asturies, y otru nel cimenteriu de Carbayín, en recuerdu a los Mártires de Carbayín, símbolu de la brutal represión que la República Española descargó contra’l pueblu asturianu tres la derrota de la revolución.

La xornada entamará a les 12:30 hores en Carbayín, onde reposen los 24 homes asesinaos depués de la ofensiva de los trabayadores de la cuenca del Nalón nos primeros díes d’aquella insurrección. Depués, a les 13:30 hores, la cita treslladarase al cimenteriu de Pando, onde s’honrará la memoria de Belarmino Tomás, Presidente del Conseyu Soberanu, quien foi ún de los principales protagonistes de la revolución, negociando la rendición pautada col exércitu republicanu español, que llueu sedría traicionada con una represión sangrina y despiadada.

La comemoración del 12 d’Ochobre ye una tradición qu’Andecha Astur celebra cada añu en contraposición a la Fiesta de la Hispanidá, pa reivindicar el deseyu de soberanía del pueblu asturianu frente al patrioterismu colonialista español, tan espardíu nos caberos tiempos. La organización recuerda que la represión que sufrió Asturies baxo la República Española siguió viva baxo la dictadura franquista y pervive tamién nel actual réxime monárquicu, polo que la cuestión asturiana ye, más qu’un problema de sistema políticu, una cuestión de dominiu nacional.

Según Andecha Astur, l’homenaxe a la República Obrera y Campesina d’Asturies, proclamada n’Ochobre del 34 frente a la República Española que invadió militarmente’l país, ye un referente de plena actualidá, porque siguen vixentes la represión de los drechos nacionales y sociales d’Asturies y el necesariu exerciciu del drechu a la soberanía como camín pa la proclamación d’una futura República Asturiana.

Ochobre torna, y cada añu torna tamién al escaezu istitucional y académicu, a pesar de que foi namás el sieglu pasáu cuando los nuesos llucharon pola llibertá. Los vencedores d’entós reescribieron la hestoria al so gustu, presentando la revolución como una revuelta caótica de trabayadores famientos, y esborrando’l fondu organizativu, políticu y moral d’aquella xesta.

Pero la Revolución d’Ochobre del 34 foi muncho más: foi una muestra colosal de valentía, de xunidá y d’intelixencia colectiva, frutu d’un llargu procesu de planificación política, sindical y militar. Solo asina foi posible que ente 30.000 y 50.000 asturianos armaos defendieren un mesmu oxetivu: crear una Asturies socialista y soberana, llibre de los poderes d’España, seya monarquía, dictaura o república.
D’aquella llucha nació la República Independiente d’Obreros y Campesinos d’Asturies, proclamada poles bases obreres al marxe de los partíos españoles y defendida pol Tercer Comité Revolucionariu, presidíu por Belarmino Tomás. Pero la resistencia foi quebrada pola fuercia brutal de la República Española, primero, y del fascismu, depués que se cebaron con Asturies ensin compasión.

Dende entós, el pueblu asturianu vien pagando nueve décades de represión, marxinación y autoodiu inducíu, ensin drechos plenos y con un ataque constante a la so identidá. El despreciu institucional pola llingua asturiana, l’esborramientu de los héroes populares de los llibros d’hestoria, y les polítiques económiques que destruyeron el texíu del país son, pa munchos, una continuación d’aquel mesmu procesu de sometimientu.

La recuperación de la Memoria Hestórica Asturiana ye, por tanto, una necesidá vital, un pasu imprescindible pa reafitar la dignidá y la conciencia colectiva d’un pueblu que foi valiente, solidariu y soberanu.
Por eso, esti 12 d’Ochobre, cuando los poderes d’España celebren la so “Hispanidá”, Asturies tornará a celebrar Ochobre, pa dicir bien alto que nun escaez, nun se rindió y nun se rendirá.

“Sabemos quién fuimos, quién somos y qué queremos ser. Nun mos rendimos”.

Llucía F. Marqués

This work is licensed under a Creative Commons Attribution 4.0 International License.