L’ALLA desixe la intervención de les autoridaes asturianes pa garantizar la igualdá académica del asturianu depués de que la Secretaría Xeneral d’Universidaes del Ministeriu de Ciencia, Innovación y Universidaes español torne arrequexar l’asturianu na enésima falta de respetu a los asturfalantes. 

La Academia de la Llingua Asturiana (ALLA) fizo públicu un comunicáu nel que tresmite’l so esmolecimientu pola esclusión de la Filoloxía Asturiana del Proyecto de Real Decreto que regula los ámbitos de conocimientu y les especialidaes del profesoráu universitariu. Esti borrador, elaboráu pola Secretaría Xeneral d’Universidaes del Ministeriu de Ciencia, Innovación y Universidaes, determina la clasificación de les places y perfíles docentes de les universidaes públiques.

El proyectu recueye les filoloxíes Española, Catalana, Gallega, Vasca y Clásiques, pero otra vegada nun inclúi la Filoloxía Asturiana, lo qu’obligaría al profesoráu del área a adscribise a un espaciu indefiníu como’l de Llingües Modernes y les sos Lliteratures. “Ye incomprensible qu’una disciplina con una trayectoria académica consolidada quede fora d’esti marcu oficial”, afirma la ALLA.

La mesma situación repítese nel apartáu de especialidaes, que sustitúin a les antigües árees de conocimientu y determinen los perfíles docentes y investigadores. El borrador menciona la Llingua y Llingüística Española, Gallega, Catalana y Vasca, amás de les sos respectives lliteratures, pero ensin facer referencia dalguna a la Llingua y Llingüística Asturiana nin a la Lliteratura Asturiana, colo que’l profesoráu universitariu d’asturianu namás podría allugase dientro de la especialidá de Llingües y Llingüístiques Romániques.

Esta situación supón una discriminación inaceptable, especialmente tres el reconocimientu académicu llográu pola Filoloxía Asturiana nes últimes décades. L’ALLA recuerda los avances como’l Mínor d’Asturianu dientro de los Graos de Filoloxía, la Mención de Llingua Asturiana nel Grau de Maxisteriu d’Educación Primaria, y la Especialidá de Llingua Asturiana nel Máster de Formación del Profesoráu d’Educación Secundaria, toos ellos estudios regulaos y acreditaos pola ANECA.

Poro, l’Academia esixe una rectificación a la Secretaría Xeneral d’Universidaes “nel sen d’asitiar la Filoloxía Asturiana nun planu d’igualdá col restu de filoloxíes del Estáu”. Amás, fai un llamamientu al Rectoráu de la Universidá d’Uviéu y a les Conseyeríes d’Educación y Cultura, amás de la Direición Xeneral d’Universidaes, pa qu’adopten una postura común de defensa de los estudios universitarios d’asturianu.

L’ALLA anuncia, finalmente, que va entamar xestiones direutes y inmediates tanto con órganos políticos como con responsables universitarios, “pa garantizar el reconocimientu que-y correspuende a la Filoloxía Asturiana nel ámbetu académicu y científicu del país”.

Susana Sela

This work is licensed under a Creative Commons Attribution 4.0 International License.