Más de 4.000 contratos finen col branu, subiendo’l paru n’Asturies -principalmente pente la mocedá- mentantu baxa nel estáu.
El paru xuvenil nun ye una anécdota de setiembre, sinón un síntoma d’un problema de fondu: la falta de polítiques eficaces que promuevan emplegos estables y dignos, que dean posibilidaes pa que les xeneraciones nueves puedan quedase y desendolcar el so futuru n’Asturies
Asturies torna salir mal parada nes estadístiques llaborales de setiembre. El fin de la temporada de branu trai consigo la espulsión de miles de trabayadores con contratos temporales, principalmente nel sector hostelería y turismu -el más precariu posible- dexando un balance ensin dulces: 1.219 persones más apuntaes al paru, lo que supón un xorrecimientu del 2,52 % con respectu a agostu, y una perda de 4.157 cotizantes a la Seguridá Social. Asina, la cifra total d’inscritos nes oficines de demandantes d’emplegu xubió hasta les 49.517 persones, nun momentu nel que, a nivel estatal, el paru baxaba y pesi a les abondes contrataciones del sector de la docencia col aniciu de cursu.
L’elementu más alarmante torna ser el que toca a la mocedá. Los menores de 25 años sumaron 403 nuevos paraos, un 12,3 % más qu’en agostu. Esta subida asoleya una realidá repetía: la mocedá asturiana sigue siendo utilizada como man d’obra barato y precario nos meses d’actividá turística y hostelera, pero desapaez del radar de los contratos en cuantu preslla la temporada; una situación que, amás d’afectar a la so economía inmediata, torga a la mocedá l’oportunidá de diseñar un futuru estable y de raigañu nel país.
Amás de la mocedá, les muyeres siguen llevando la peor parte del desemplegu. En setiembre rexistráronse 29.335 paraes, 818 más que’l mes anterior, frente a los 20.182 homes, con 401 nuevos desemplegaos. Los sectores con más destrucción d’emplegu fueron, previsiblemente, los servicios –que sumen 36.631 paraos–, siguíos de la industria y l’agricultura. La construcción foi l’únicu sector que recortó’l paru, seique mui llexeramente.
Esti panorama evidencia una vegada más la debilidá de cadarma del mercáu llaboral asturianu. Los datos confirmen que’l branu nun crea trabayu de calidá, sinón ocupación temporal destinada a ser barrida en setiembre.
Incluso cuando nun tan en paru, la mayoría de los asturianos (nuevamente más acentuao en mocedá y muyeres) enfrentense al retu de sosistir con salarios que nun cubren el coste de la vida y una proteición social que malpenas algama: 22.400 paraos nun cobren ya dengún tipu de prestación de desemplegu y más de 10.000 desemplegaos subsisten con prestacionaes asistenciales de 480 euros al mes.
Llucía F. Marqués
This work is licensed under a Creative Commons Attribution 4.0 International License.
