Dellos colectivos sociales y vecinales anunciaron que van sumase esta tarde, a les 19:00 hores, a les concentraciones convocaes en distintos conceyos asturianos, en respuesta al asaltu carecíu pola Flotina Global Sumud, la iniciativa internacional que navegaba con ayuda humanitaria rumbu a Gaza.
Baxo’l llema «¡Asaltaron la flotina! ¡Toes a la cai!», la convocatoria fai un llamamientu a la ciudadanía pa vaciar les aules, cortar les cais y participar nes protestes que se van desendolcar simultáneamente en numberosos conceyos.
La xornada de movilizaciones coincide cola fuelga educativa d’esti xueves 2 d’ochobre, dirixida al alumnáu a partir de 3º d’ESO. N’Asturies, el Sindicatu d’Estudiantes cellebró manifestamientos masivos a les 12:00 hores n’Uviéu y Xixón. L’oxetivu inicial yera desixir el fin del xenocidiu en Gaza, pero tres los últimos acontecimientos, les movilizaciones visibilizaron tamién la denuncia pol asaltu a la flotina.
Los convocantes de les concentraciones reclamen la lliberación inmediata de la flotina, l’embargu d’armes a Israel y la rotura de rellaciones diplomátiques. Les movilizaciones encuádrense nuna campaña internacional promovia pol movimientu Global Movement to Gaza, que denuncia’l bloquéu a la Franxa y la grave situación humanitaria del pueblu palestín.
Dende esti movimientu animen a la población a entamar aiciones en barrios, centros de trabayu y educativos p’amosar solidaridá con Palestina y esixir responsabilidaes pol ataque a la flotina, que tresportaba materiales mélicos, alimentos y productos básicos, y na que participaben activistes internacionales.
Llucía F. Marqués
This work is licensed under a Creative Commons Attribution 4.0 International License.
