El BOPA vien d’espublizar l’anuncia de que sigue la tramitación del parque eólicu de la Mofosa, un proyectu que va afeutar a los conceyos de Les Regueres, Candamu, Illas y Llanera
Trátase d’una instalación compuesta por 8 aeroxeneradores de 6,8 Mw de potencia ca ún, que se quier emplazar nos montes cercanos a Bolgues, Les Ablanosas y Soto, en Les Regueres. Esti espaciu ta catalogáu como Suelu Non Urbanizable d’Especial Protección, onde’l planeamientu actual del conceyu prohibe esti tipu d’infracadarmes. L’Ayuntamientu yá adelantrara que nun tenía intención de camudar la normativa.
Los molinos previstos van algamar 200 metros d’altor, con 112 de buxe y 175 de rotor, y van contar con una llinia d’alta tensión que conectará con Illas.
Dende la Coordinadora Ecoloxista d’Asturies amosaron el so descontentu “Los aeroxeneradores previstos nesti suelu protexíu son incompatibles coles directrices sectoriales en vigor, polo que nun entendemos que’l procesu siga alantre”.
Amás de la alteración paisaxística, l’entidá alerta de les implicaciones pa la seguridá y la tranquilidá de les families que viven dientro d’esti radiu d’afeición, onde yá funciona’l parque eólicu del Cuervo, con 8 molinos, y ta previstu’l del Bufarán, con otros 11. Reivindiquen que se faga un estudiu conxuntu de tolos proyectos previstos, pa valorar l’efeutu real sobre la sierra que dixebra Les Regueres de Candamu.
La Coordinadora recuerda amás que’l desarrollu de los parques eólicos n’Asturies vien arrastrando irregularidaes dende hai años, ente elles la falta d’una Evaluación Ambiental Estratéxica (EAE), tal como recueye la Directiva 2001/41/CE y la Llei 9/2006, del 28 d’abril, sobre l’afeutu ambiental de planes y programas.“Entá tamos esperando que se resuelvan les denuncies presentaes nes caberes décades polos daños ambientales, urbanísticos y al padremuñu históricu. Mentanto, les eóliques sigan campando a les sos anches per Asturies”, denuncien dende la Coordinadora.
Nel Dos Santos
This work is licensed under a Creative Commons Attribution 4.0 International License.
