L’eventu va aconceyar en Xixón a representantes de 68 llagares procedentes de 18 países, con más de doscientes propuestes sidreres a disposición de profesionales y públicu xeneral.
La capital de la costa central asturiana tórnase dende mañana, 25 de setiembre y hasta’l domingu nel epicentru mundial de la sidre cola cellebración del 15º Salón Internacional de les Sidres de Gala (SISGA).
La xornada inagural va celebrase a les 11:00 hores nel Hotel Tryp Rey Pelayo. Marcos Abel Fernández, presidente de la Fundación Asturies XXI, va ser l’encargáu de presentar oficialmente esta edición, que s’abrirá con una tastia de la sidre irlandesa Stonewell, dirixida pol so ellaborador, Eamon Lucey.
L’actividá treslládase pela tardi a Villaviciosa y Nava, con parada nel Llagar Cortina pa una visita con tastia de sidre de xelu a cargu de Tino Cortina. Darréu, los participantes van dir al Muséu de la Sidra d’Asturies, onde van ser recibíos pol alcalde de Nava, Juan Cañal, y el direutor del muséu, Juan Stové. Una mesa redonda alredor del turismu venceyáu a la sidra y la mazana completará la programación, con voces internacionales como Asnate Ziemele (Letonia) y Mª José Valente (Portugal), la participación de Turismo Xixón y la intervención de Mariana Santos por parte de Cider Cities. La xornada va zarrar cola actividá “De chigres per Nava”, un percorríu per sidreríes del conceyu.
El programa del SISGA destaca pola so intensidá y diversidá: visites a llagares, pomaraes y museos; cates guíaes; debates sobre’l futuru del sector; actos institucionales y espacios pa conocer la gastronomía asturiana de la man d’Alimentos del Paraísu.
Como anticipu, esti mesmu miércoles celébrase nel CIFP d’Hostelería y Turismu de Xixón una sesión especial de la Escuela de Sumillería, dedicada a les sidres de xelu y de fueu, con participación d’Alfonso Castañón, enólogu del Llagar Castañón, y del profesoráu Juan Luis García y Benedicta Zurro. L’actividá rematará con una visita guía al Llagar JR.
Pa la ciudadanía, la cita clave va ser el sábadu 27 cola Tastia Abierta al Públicu, que van cellebrase nel Pabellón de Congresos de la Feria Internacional de Mueses d’Asturies (FIDMA) coincidiendo cola feria AGROPEC. Por 10 euros, los asistentes van poder tastiar más de 200 sidres de tol mundu, -destacando pente elles les meyores sidres de copa asturianes- falar direutamente colos llagareros y adquirir productos tan diversos como sidra brut, espumosa, de xelu, de fueu, semiseca, vermú o aguardiente.
La Tastia Abierta va tar disponible en doble sesión: de 12:00 a 15:00 hores y de 17:00 a 20:00 hores. Al empar, van desendolcase presentaciones abiertes al públicu de dellos productores.
Nel Dos Santos
This work is licensed under a Creative Commons Attribution 4.0 International License.
