Llucía F. Marqués

Coses que pasen cuando mama y papa nun se ponen d’alcuerdu. Ún diz qu’hai que quitar el peaxe, que ya valió de castigar al nenu; l’otru que non, que hasta’l 2050, ensin tonteríes

Y entantu y non, los asturianos a veles venir, mientres el gobiernu d’Asturies espera ilusionau que la disputa familiar derive’n so favor. Ensin votu y con mui poca voz, Asturies tien nesti casu, comu en prauticamente toos, el papel de menor tutelau. Nin siquier tien una baza pa negociar, vivimos baxo’l reinau de la cellebre frase, “mientres vivas na mio casa fadrás lo que yo diga”.

Y si, vivimos na so casa, baxo les sos normes, siguiendo les sos regles, y pa enriba somos el fiu obediente, el que nun monta nin una pataleta y como muncho pon fociquinos mientres fae lo que-y manden y ve qu’a los otros se yos consiente -la prautica totalidá de les autopistes estatales costruyies cuando’l Güerna tan lliberaes de pagu hai tiempu-. Porque claro, nun tenemos competencies, nin gana teneles, colo cómoda que vive la clas política asturiana echando balones fuera.

Años afondando na dependencia, económica, enerxética, política… el resultau ye esti, una Asturies que declaró la indepandencia dos vegaes el sieglu pasáu pero a la qu’agora dicen lo que facer. Y si quies salir de casa, paga fielatu.

This work is licensed under a Creative Commons Attribution 4.0 International License.