El próximu 20 de setiembre, l’Antigua Escuela de Comerciu de Xixón, nel so espaciu mozu, va ser l’escenariu de la sexta edición del Salón del Videoxuegu, una cita dedicada al mundu gaming y a la formación STEAM. L’eventu va celebrase en sesión maratoniana, en turnu de mañana de 10 a 14 hores y en turnu de tarde de 16 a 20 hores.
El Salón tien como oxetivu averar y dar a conocer los videoxuegos y la formación STEAM de primer man. L’espaciu va cuntar con videoconsoles asgaya que van actuar como reclamu pa la mocedá y les families, anque’l verdaderu centru de la programación va tar na formación vinculada al desendolcu d’aplicaciones, la robótica y la creación de videoxuegos.
Amás de les zones de xuegu, el públicu asistente va poder esfrutar d’equipos de realidá virtual y d’un ampliu programa de conferencies y actividaes llúdiques. Dende la organización destácase la necesidá de xunir el mundu del videoxuegu col de la formación, recordando que los profesionales del presente y del futuru son diseñadores, programadores, artistes y expertos en comunicación, y que cada videoxuegu ye, en esencia, el productu del trabayu conxuntu de tolos perfiles STEAM.
La programación inclúi talleres prácticos, ente los que s’atopa unu de programación de videoxuegos arcade, que se va desenvolver en dos sesiones consecutives, la primera de 17 a 18 hores y la segunda de 18 a 19 hores. El programa completarase con un taller de robótica, que va realizase de 20 a 21 hores.
Toles actividaes son de baldre, tanto l’accesu xeneral como la participación nos talleres. Nesti últimu casu ye necesaria la inscripción previa, que puede facese al traviés del corréu electrónicu salonvideoxuegu@gmail.com, indicando la hora, el taller escoyíu, los datos personales y un teléfonu de contautu. El programa completu y les posibles actualizaciones van tar disponibles na web oficial del eventu: salondelvideoxuegu.es.
El Salón del Videoxuegu cellebra la so edición númberu seis gracies al sofitu de la Conseyería de Ciencia, Empreses, Formación y Emplegu del Gobiernu del Principáu d’Asturies, amás de Xixón Impulsa, Xixón Mocedá y Asturies Cultura en Rede, ente otros patrocinios.
Llucía F. Marqués
This work is licensed under a Creative Commons Attribution 4.0 International License.
