Fasta’l 4 de setiembre y dende l’aniciu del conflictu confírmase l’asesinatu de 229 periodistes y trabayadores de medios  nos territorios de Gaza, Cisjordania, Israel y Líbano. La protesta d’ayeri n’Uviéu foi un recordatoriu de que’l periodismu, en cuantes oficiu y en cuantes compromisu social, tien que siguir siendo una voz incómoda, crítica y solidaria. 

La plaza de la Escandalera d’Uviéu convirtióse ayeri, 10 de setiembre, nun espaciu de protesta y compromisu. Arredor de trescientos periodistas y fotógrafos d’Asturies xuntáronse ellí pa denunciar lo que consideren un “xenocidiu” escontra la población de Gaza y pa reclamar la llibertá d’espresión ensin torgues nin silencios impuestos.

La concentración, convocada pola Asociación Profesional de Fotoperiodistes Asturianos y el Colexu Profesional de Periodistes d’Asturies, foi una llamada a la solidaridá internacional y al mesmu tiempu un exerciciu de dignidá profesional.

Les imáxenes de la protesta falaben per sí soles: banderes palestines ondeando nel centru d’Uviéu, pancartes con llemes como “Nun ye una guerra, ye un xenocidiu” o “Israel asesina, Europa patrocina”, y un corríu de voces que reclamaben la fin de la violencia sobre la población civil. Los profesionales de la comunicación quixeron faer visible que’l so llabor nun s’acaba na redacción nin tras la cámara: informar tamién significa tomar postura cuando la realidá presenta atropellos tan evidentes.

Na llectura del manifiestu, los convocantes recordaron que’l periodismu ye un derechu democráticu esencial y que nun puede exercese baxo presión nin censura. Reivindicaron tamién el papel de los que trabayen en zones de conflictu, en condiciones precaries y arriesgaes, pa qu’el mundu sepa lo que ta pasando. Nel casu de Gaza, afitaron que la violencia escontra la población civil y l’atacamientu a profesionales de la información nun puede quedar ensin denuncia.

 El fechu de que seyan periodistas y fotógrafos los que salgan a la cai ufierta un mensaxe potente: los que tán acostumaos a narrar y documentar lo que-yos pasa a otros colectivos decidieron, nesti casu, tomar la pallabra pa reivindicar el so propiu papel y pa desixir que’l sufrimientu en Gaza nun quede invisibilizáu.

Susana Sela

This work is licensed under a Creative Commons Attribution 4.0 International License.