Samartín del Rei Aureliu va acoyer del 3 al 5 d’ochobre la feria ‘Presura 25 pa la repoblación de la España Rural’. L’eventu preséntase como un escaparate d’“oportunidaes” y un llamáu al renacimientu rural, pero pa munchos colectivos d’Asturies nun ye más que otra campaña de colonización de los pueblos, destinada a capitalizalos y a facelos más atractivos pa les necesidaes d’urbanites en busca de comodidá o perfiles más guapos en redes sociales.
El proyeutu afirma querer repoblar les zones rurales, pero la realidá asturiana ye bien otra. N’Asturies nun sobra terrén nin falten persones con gana de raigañase nos pueblos; nun fae falta xente de fuera que venga a ocupar los pueblos, faen falta medios, servicios y dignidá vital pa que quien yá vive n’ellos nun tenga que marchar, y pa que quienes tuvieron que colar pol abandonu sistemáticu de lo rural —y los sos descendientes— puedan volver.
Los actuales moraores de l’Asturies rural temen les consecuencies d’esa llamada “Otra manera de esterminiu del mundu rural y de la so cultura y les sos tradiciones”, declaraba F.M.R, activista en defensa de los drechos de los pueblos asturianos.
Dende’l movimientu social y cultural asturianu lleguen voces que caltienen un esmolecimientu claro, temen que “Nun se trata de fortalecer les comunidaes qu’esisten, integrando a nuevos moraores nes tradiciones y modos de vida propios de los pueblos asturianos, nin de buscar relevu xeneracional, sinón de convertir los pueblos en espacios pa teletrabayadores, empresarios turísticos y rentistes de media Europa”.
Les consecuencies yá se conocen: encarecimientu xabaz de la vivienda, presión sobre los recursos, abandonu de les actividaes económiques tradicionales —precisamente les que cuiden del paisaxe y del entornu— y un choque cultural que fai que lo propio se vea como un estorbu: el cuchu güele y los pitos canten mui temprano.”.
Mientres Presura se presenta como un escaparate d’innovación, cultura y emprendimientu, los pueblos asturianos reclamen lo básico: escueles abiertes, consultorios médicos con personal, accesu a servicios dixitales, comunicaciones decentes y apoyu real al sector primariu. Porque ensin eso, cualisquier discursu sobre repoblación ye solo una campaña de maquillaxe, un relatu pa camuflar el traspasu del territoriu a nuevos intereses.
En definitiva, el futuru del mediu rural asturianu nun depende de feries nin de slogans publicitarios: depende de devolver la dignidá a la vida de los pueblos, respetando la so identidá, la so cultura y les sos tradiciones. Y eso, de momentu, nun ta nos planes de Presura.
Susana Sela
This work is licensed under a Creative Commons Attribution 4.0 International License.
