La Biblioteca d’Asturies «Ramón Pérez de Ayala» acueye’l miércoles 10 de setiembre, a les 18:30 hores, la presentación del primer tomu de la reedición, correxida y ampliada, de la Historia de la Lliteratura Asturiana.
L’actu va contar cola presencia de los coordinadores de la obra, Xosé Ramón Iglesias Cueva y Marta Mori d’Arriba; el presidente de l’Academia de la Llingua Asturiana (ALLA), Xosé Antón González Riaño; y el direutor xeneral d’Acción Cultural y Normalización Llingüística del Gobiernu del Principáu, Antón García. Tamién van asistir dellos de los autores que collaboren nun volumen que supón la revisión y puesta al día d’un trabayu de referencia.
La Historia de la Lliteratura Asturiana asoleyose per primer vegada hai más de venti años y, dende entós, convertiérase nun instrumentu esencial pa la conocencia y l’estudiu de les lletres n’asturianu. La primer edición, que s’esgotara al pocu de salir a la cai, quedara escasa pa recoyer les múltiples novedaes que la creación lliteraria y la investigación académica fixeron surdir nos caberos años.
Esta reedición correxida y ampliada vien, poro, a cubrir esi vacíu, incorporando nuevos enfoques y trabayos qu’espeyen l’ariquecimientu de la lliteratura asturiana nes dos caberes décades. Los coordinadores del volume destaquen que’l llibru nun se llinda a un simple reciclaxe de materiales, sinón que se trata d’una obra renovada que recueye’l dinamismu del campu llingüísticu y cultural asturianu.
Cola cellebración d’esta presentación, la Biblioteca d’Asturies consolídase como un espaciu de referencia pa l’espardimientu y el fomentu de la cultura propia, al empar que se da un pasu importante pa garantizar que la llectura y el conocimientu de la lliteratura asturiana sigan siendo accesibles a nueves xeneraciones d’investigadores, estudiantes y llectores.
Susana Sela
This work is licensed under a Creative Commons Attribution 4.0 International License.
