El Conceyu de Xixón piensa retirar pa usu propiu los doce millones d’euros qu’acumula Servicios Sociales, mientres la población pasa necesidaes básiques, a los que se sumen los remanentes de les empreses de tresporte, agua y recoyida de basories.

El Conceyu decidió desviar más de 12 millones d’euros del superávit acumuláu poles empreses municipales y Servicios Sociales (4 millones de Servicios Sociales, 1,6 d’EMULSA, 2,6 d’EMA…) p’amortizar la so delda bancaria, en llugar d’invertir esos fondos na necesaria meyora d’esos servicios, reforzar les plantiyes y atender les necesidaes reals de la población.

Esta midida supón, na práctica, la descapitalización d’entidaes que presten servicios públicos esenciales y que yá arrastren importantes déficits estructurales: falta de personal, escasez de medios materiales y carencia de recursos básicos pa desempeñar la so actividá.

Casos como’l créditu que tuvo que pidir EMTUSA —y non el Conceyu— por problemes de financiación, la subida d’impuestos pa “subsannar” EMULSA (que nun se fixo, sinón que se privatizaron servicios) o’l fechu de que na EMA nun se dediquen los remanentes a meyores na rede d’agua, saneamientos o reposición de personal, amuesen bien claru’l despropósitu de retirar unos fondos que faen falta utilizar con urxencia.

Ye especialmente grave’l casu de la Fundación Municipal de Servicios Sociales, que tien un remanente de 12 millones d’euros. Nun ye asumible que esi dineru quede paralizáu mientres cientos de xixoneses siguen esperando ayudes básiques pa poder vivir con dignidá, con persones en riesgu d’esclusión social o ensin proyectos pa frenar la probeza na ciudá. Esa decisión priva de recursos a la xente que más los necesita.

Les seiciones sindicales n’EMA (UGT y LCT), n’EMTUSA (UGT, USIPA y CSI), n’EMULSA (UGT, CSI y CT) y la CSI espresen públicamente’l so refugu a esa política del equipu de gobiernu municipal de Xixón, consistente en retraer los remanentes d’ayalguería de les empreses públiques y de la Fundación Municipal de Servicios Sociales pa destinalos al pagu de la deuda xeneral del Conceyu. Reclamen un modelu de xestión pública que priorice a les persones, refuerce los servicios públicos y respete a les plantiyes que los caltienen.

«Usar los remanentes de les empreses municipales pa tapar furacos contables xeneraos pola pésima xestión política ye una decisión grave, que compromete’l futuru de lo público y pon en riesgu les mesmes empreses municipales».

Nel Dos Santos

This work is licensed under a Creative Commons Attribution 4.0 International License.