Vivir n’Asturies, sobre tou con una cierta dignidá, cuesta. Cuesta tener onde vivir, de qué vivir, cómo vivir. Ehí ta la base na que s’afiten les estadístiques más murnies del país, les que ponen a Asturies por una vegada en primer puestu, les de suicidios.
Tan a la vista los resultaos de la estratexa puesta en marcha pola Conseyería de Sanidá nel añu 2017 pa prevenir el suicidiu. La tasa de muertes por esta causa asítiase’n 14 víctimes por 100.000 habitantes, alrodiu 140 asturianos que decidieron quitase la vida, tres a la selmana, cuasique un ca dos díes. La tasa de suicidios xube a los 25 por 100.000 habitantes na franxa d’unos 100 kilómetros que xune la población de Gozón con Cangues, ún ca 35 hores. La tasa media estatal ye de poco más de 7 suicidios por 100.000 habitantes, según datos del INE.
Les cifres falen d’un xorrecimientu pente adolescentes y mocedá, con cuatro suicidios de menores d’edá -ente 11 y 18 años-. Destaquen tamién que, a la escontra de la tendencia xeneral d’Europa, hai un altu númberu de muyeres pente les víctimes.
Esti añu’l teléfonu la Esperanza rexistró ya 120 llamaes de persones con intención de suicidase, seis d’elles cuando ya taba en marcha’l procesu de quitase la vida. Un estudiu de la Universidá d’Uviéu revelaba que’l 3% de los asturianos consultaos tien pensáu un plan de suicidiu.
La falta de perspeutives de futuru, el desenfotu, la perda identitaria, la precariedá llaboral y vital y la baxa calidá de vida en xeneral xúnense a un serviciu de Salú Mental ineficiente dafechu pa desplicar estos datos.
Con más de 3.000 finaos por esta causa no que llevamos de sieglu, les cifres asturianes tán al nivel de les zones europees más castigaes por esti problema, compartiendo con elles dellos factores: Territorios fuertemente industrializaos en recesión, con población avieyao, munches vegaes d’orixe rural, con una fuerte dispersión y en situación de cayente económicu.
Otru denominador común ente les poblaciones con mayor incidencia de los comportamientos suicides ye la falta d’enraigonamientu, esto ye, con frecuencia son más los casos ente les persones que s’atopen aisllaes de la so cultura, xeneralmente inmigrantes. El casu asturianu ye peculiar a esi respeutu, siendo mayor la incidencia ente los asturianos de nacencia, dando llugar a pensar que quiciabes esista una correlación ente la desvinculación de la sociedá asturiana cola so cultura tradicional y l’aumentu de los suicidios.
Llucía F. Marqués
This work is licensed under a Creative Commons Attribution 4.0 International License.
