La plataforma solidaria Asturies con Palestina inagura esti vienres 5 de setiembre a les 17:00 na Sala d’Esposiciones Municipal “Antonio Mingote” la esposición Arte Asturianu contra’l xenocidiu palestín.
La esposición, que yá vien itinerando por distintos conceyos asturianos, busca contribuir a la solidaridá indispensable y a la denuncia de la realidá diaria del xenocidiu perpetráu pol Estáu d’Israel, que continua pese a la creciente indignación internacional. Coles pieces que la conformen, quier espresase tamién que la cultura nun pue ser indiferente nin cómplice de los terribles impactos sobre la población palestina, especialmente sobre muyeres y menores, principales víctimes d’un conflictu que se perpetúa dende 1948 y que vien acompañáu d’un incumplimientu sistemáticu por parte israelí de resoluciones de la ONU, los DDHH y el Derechu Internacional Humanitariu.
La muestra reúne obres de cerca de trenta artistes asturianos o residentes n’Asturies, con pieces de pintura, escultura, poesía, bordaos palestinos y otres formes d’espresión artística. Forma parte de la iniciativa Cultura Asturiana con Palestina y cuenta col sofitu del Principáu d’Asturies, la Federación Asturiana de Conceyos y, nesta ocasión, del Ayuntamientu de Noreña.
La esposición podrá visitase na Sala “Antonio Mingote” ente’l 3 y el 12 de setiembre de 2025. Les visites sedrán con cita previa n’horariu de mañanes y con entrada llibre les tardis de 17:00 a 20:00 hores.
Tamién el vienres tan convocaes aiciones al pasu de la Vuelta Ciclista per Asturies contra la participación israelina na mesma.
Susana Sela
This work is licensed under a Creative Commons Attribution 4.0 International License.
