El Plan Estratéxicu de Residuos d’Asturies 2025–2030, promovíu pol Gobiernu del Principáu, topóse cola oposición frontal d’Andecha Astur. La organización vien de presentar alegaciones formales denunciando que’l documentu “supón la perpetuación d’un modelu fracasáu basáu na incineración y nel vertíu, contrariu a les direutives de la Xunión Europea y a les desixencies sociales”.
Dende la organización nacionaliega critiquen que la tramitación vulnera’l Conveniu d’Aarhus, al escluir una participación ciudadana efeutiva: “plazos curtísimos, documentación d’accesu difícil y una evaluación ambiental que nun s’axusta a la normativa europea”, aseguren. P’Andecha, esto invalida ya’l plan como ferramienta de planificación seria.
Un de los puntos más cuestionaos ye la falta d’estratexa preventiva. El plan —afirmen— nun cumple cola xerarquía marcada pola UE (prevención, reutilización, reciclaxe) y nun contempla midíes concretes contra’l plásticu d’un solu usu, el despilfarru alimentariu o la reducción global de residuos.
Andecha denuncia tamién que’l documentu oficial repite’l esquema de xestión de COGERSA, centráu nel vertederu y na quema, con instalaciones “sobrodimensionaes” y soluciones “engañoses” como’l CSR (Combustible Sólidu Recuperáu), “que nun ye otra cosa que una xustificación pa siguir quemando”.
La incineración, recuerden, emite CO₂, dioxines y furanos con “impactos graves sobre la salú pública”. L’avisu ye claru: la UE obliga a que pa 2035 namás el 10% de los residuos municipales acaben en vertideru, pero’l plan “nun marca un camín pa cumplir esi oxetivu”.
Frente a esti modelu, la organización defende un cambiu de ruta qu’apueste pola recoyida separtada de la materia orgánica con un oxetivu mínimu del 80%, acompañada de la creación d’una rede descentralizada de plantes de compostaxe. Amás, considera esencial ampliar los puntos llimpios y dar sofitu real a la reutilización, al tiempu que s’apliquen midíes fiscales que penalicen el vertíu y l’usu d’envases d’un solu usu, favoreciendo l’ecodiseñu y la incorporación de materiales secundarios.
Amás de la cuestión ambiental, Andecha soraya’l potencial económicu del cambiu: “La reciclaxe y la reutilización xeneren hasta 10 vegaes más emplegu que la incineración. Asturies podría liderar un modelu circular, pero’l plan oficial opta por siguir protexendo intereses empresariales”.
Ante esti panorama, la organización reclama la retirada del Plan de Residuos tal y como ta redactáu y una revisión integral que priorice la prevención, la reutilización y l’economía circular, “únicu camín que puede dar respuestes reales a los retos ambientales y sociales d’Asturies”.
Llucía F. Marqués
This work is licensed under a Creative Commons Attribution 4.0 International License.
