L’Asociación XEGA anunció esti vienres que nun va formar parte de la IV Muestra de Cine Llésbicu d’Asturies, que se celebra en Xixón, pesi a la invitación recibida pola organización del certame.
El motivu d’esta decisión ye la inclusión na programación de Dulce Gallego Canteli, exconseyal del PSOE en Xixón, que va presentar una de les proyeiciones. XEGA recuerda que Gallego espublizara’l 22 d’avientu de 2024 un artículu en El Comercio, baxo’l títulu “A vueltas con la Q y el signo +”, nel que, según la asociación, espublizó mensaxes qu’“estigmaticen y cuestionen” les sigles LGTBIQA+, llegando a vincular “de manera falaz el + cola pedofilia”.
La organización considera que estes declaraciones dañen la integridá del colectivu y reproducen “narratives d’odiu contraries a los valores d’inclusión y respetu” que defende. Aunque les responsables de la Muestra indicaron que nun se faen responsables de les opiniones de les persones collaboradores, XEGA recalca que “la seguridá, dignidá y bienestar de toles identidaes del colectivu son una llinia collorada innegociable”.
“Nun podemos sofitar un espaciu que llexitime voces que socaven estos principios”, afirmaron dende la asociación, qu’almitió que la decisión “nun foi fácil” y qu’en pasaos años la Muestra supunxo un espaciu “de gran visibilidá pa la cultura llésbica asturiana”.
A pesar d’ello, XEGA destaca la necesidá de “caltenese firmes na defensa d’un movimientu LGTBIQA+ inclusivu, seguru y llibre de discursos dañinos”. La entidá anuncia que va siguir trabayando pa “abrir y curiar otros espacios” que representen con claridá y coherencia los drechos y la dignidá de toles persones del colectivu.
Llucía F. Marqués
This work is licensed under a Creative Commons Attribution 4.0 International License.
