Denuncien que’l “Centru de Visitantes del Prerrománicu” atentaría l’entornu del palaciu, ufriría información sesgada y tendría un fin especulativu, señalando que la propiedá del arzobispáu sobre’l mesmu ye de llegalidá dudosa y recalcando que ye padremuñu de tolos asturianos

El Grupu d’Inmatriculaciones d’Asturies, xunto con Asturies Laica, faen pública la so oposición al proyectu presentáu pol Arzobispáu d’Uviéu pa construyir un “Centru de visitantes del Prerrománicu” nel entornu de Santa María del Naranco, conocíu tamién como’l Palaciu de Ramiru I. Esti proyeutu, al tar a menos de 100 metros del monumentu, podría alterar significativamente un espaciu reconocíu pola UNESCO como Bien Padremuñu de la Humanidá.

Los colectivos recordaron que’l prerrománicu asturianu ye un conxuntu monumental construíu polos reis del Reinu d’Asturies y que, por ello, pertenez a tol pueblu asturianu. Amás, faen fincapié en que la so conservación siempres se fixo con fondos públicos, destinándose cantidaes inxentes de perres de les alministraciones a restauralo.

Tamién denunciaron el procedimientu pol que munchos d’estos bienes fueron inmatriculaos pola Ilesia: con una simple certificación eclesiástica, esto ye, una declaración unillateral ensin garantíes xurídiques. Nesi sen, sostienen que nun puede admitise la presunción de titularidá eclesiástica sobre edificios que, como nel casu de Santa María del Naranco, nin siquier fueron construíos pal cultu nin consta que tengan inscripción nel Rexistru de la Propiedá.

L’edificiu que l’Arzobispáu quier rehabilitar pa esti centru correspuende a la conocía como casa rectoral, pero nel catastru ta catalogada como cuadres y almacenes en suelu rústicu. Nun ye la primer vegada que se propón una intervención sobre’l mesmu: en 2017 denegóse-yos la llicencia pa convertir l’espaciu en vivenda residencial.

Agora, el proyectu preséntase baxo la denominación de “Centru de visitantes del Prerrománicu”, ocultando –según denuncien los colectivos– los sos aspectos más especulativos.

Les asociaciones recuerden que yá esiste a unos 50 metros el Centru de Recepción y Interpretación del Prerrománicu Asturianu, de titularidá pública, al que correspuende desenvolver esta función. Esti equipamientu podría garantizar una interpretación profesional y rigurosa de los monumentos, amás de xestionar de manera tresparente los accesos y los donativos pola entrada, que güei son de xestión opaca ya ensin control fiscal.

Nel Dos Santos

This work is licensed under a Creative Commons Attribution 4.0 International License.