La plataforma Asturies con Palestina (AcP) tien convocada pa esta tardi, a les 17 hores, una intervención pública de solidaridá col pueblu palestín. L’actu va desendolcase na Sablera San Llorienzu, a l’altor de La Escalerona, onde va realizase un mural acompañáu del repartu de material informativu
Esta aición entama nel marcu de la iniciativa internacional conocida como Flotina de la Llibertá, que tien como oxetivu romper simbólicamente’l bloquéu impuestu por Israel a la franxa de Gaza. El próximu domingu 31, esa flotina va partir cargada con ayuda humanitaria pa una población sometida dende hai meses a una situación de fame, escasez de suministros básicos y vulneración sistemática de los sos drechos fundamentales.
Dende AcP espónse que la convocatoria pretende visibilizar la solidaridá asturiana con Palestina y reforzar la denuncia del bloquéu illegal, que priva a la población gazatí del accesu a recursos esenciales. Amás, la plataforma quier enmarcar esta intervención dientro de la campaña internacional de sofitu al pueblu palestín, qu’aglutina colectivos de dellos países y que tien na flotina ún de los sos símbolos más reconocibles.
Asina mesmo, la organización recuerda que pa’l sábadu 30, a les 18 hores, en Xixón, hai prevista una performance solidaria que percorrerá’l tramu comprendíu ente Les Lletrones y La Rula. Esti actu forma parte de la convocatoria internacional de la Global Sumud Flotilla, y busca dar continuidá a les movilizaciones que, n’estremaes ciudaes, tán denunciando la violencia exercía pol Estáu d’Israel, amás del so incumplimientu continuu de les resoluciones principales de les Naciones Xuníes, de los Drechos Humanos y del Drechu Internacional Humanitariu.
Susana Sela
This work is licensed under a Creative Commons Attribution 4.0 International License.
