De fechu, el reglamentu que rixe’l furrulamientu’l mercáu nun torga esplicitamente la entrada de menores nel mesmu

El futuru de la ganadería asturiana, que depende direutamente de la incorporación al mesmu de les nueves xeneraciones, tornó ser esti llunes al centru del alderique. Daniel Berdasco, copropietariu de la empresa cárnica Benfer, denunció la imposibilidá del so fíu, de 15 años, d’acceder al mercáu de ganáu de La Pola Siero, onde un funcionariu-y torgó la entrada al considerar que los menores nun pueden tar presentes nel recintu.

El mozu, estudiante entá, acude davezu col enfotu de siguir la tradición familiar y tomar el relevu del padre y del güelu. “Tien interés en conocer cómo se faen les transacciones de ganáu, deprender dende abaxo y vivir de cerca’l furrulamientu del sector”, desplicó Berdasco. Sicasí, el funcionariu nun permitió la so entrada tres comprobar la edá, sofitáu depués pol direutor del mercáu.

La xustificación oficial foi evitar riesgos nel casu de que’l menor sufriese un accidente. L’empresariu propunxo firmar un documentu d’asunción de responsabilidá, pero la ufierta foi refugada. Inclusive se presentó la Policía Local, qu’axustó un atestáu ensin facer más.

En munchos concursos de ganáu ye avezada y bien recibía la participación de rapacinos, y n’otres feries, como la de San Agustín n’Avilés, nun hubo torga nenguna a la presencia de menores. Amás, el reglamentu del mercáu sierense nun recueye denguna prohibición al respectu.

Berdasco calificó la decisión como un abusu y recalcó’l contrasentíu: “Dende la política fala­se d’apoyar al campu, de favorecer el relevu xeneracional y de lluchar contra’l vaciáu rural, pero a los mozos con ilusión por siguir col negociu familiar quíeren torgayos el pasu”.

La esistencia de xubilados participando activamente nes feries, ensin que se-yos plantegue problema dalu, contrasta col vetu a un rapacín de quince años, lo que pa munchos actores del sector pon de manifiestu la necesidá de revisar normes y criterios que, güei por güei, llinden la tresmisión del saber ganaderu d’una xeneración a otra.

Llucía F.Marqués